.png)
Gazeta Si – Numri 2 në botë, përpara 5-2 dhe me shansin për të mbyllur ndeshjen, u eliminua nga tenistja çeke, surpriza e turneut, që do të luftojë për trofeun në finale ndaj numrit 1 Iga Shviatek.
Kundër çdo parashikimi, Karolina Muçova do të luajë në finalen e Roland Garros, ku ka mundësinë të fitojë trofeun e parë Slam në karrierë. Tenistja çeke, numri 43 në botë, mundi Arina Sabalenkën 7-6, 6-7, 7-5, duke luajtur një ndeshje të paharrueshme, mes tenisit total, një përmbysjeje të pamundur 5-2 dhe një ‘match point’-i të shpëtuar.
Tani duhet të mundë kampionen në fuqi Iga Shviatek, e cila eliminoi në gjysmëfinalen tjetër 6-2 dhe 7-6 Beatriz Hadad Maia. Tenistja polake jo vetëm garantoi mundësinë për të mbrojtur titullin, por pas humbjes së Sabalenkës është e sigurt në vendin e parë të renditjes botërore, cilido qoftë rezultati i finales.
Twists and turns at every corner 👀
— Roland-Garros (@rolandgarros) June 8, 2023
Catch up on the Highlights of the Day by @emirates from Karolina Muchova's thrilling semifinal win over world No.2 Aryna Sabalenka.#FlyBetter #RolandGarros pic.twitter.com/ocCeEzWWnK
Nëse Philippe Chatrier do të ishte një teatër, publiku parisien do të ngrihej në këmbë dhe do të kërkonte përsëritjen. Muçova mundi Sabalenkën, duke iu përgjigjur potencës së bjellorueses me prekje artisteje dhe një gjeniu të lojës. Sabalenka provoi gjithçka, nga të gjitha anët, më shumë se zakonisht, por nuk ia doli. Ajo bëri edhe një vetvrasje sportive, duke shpërdoruar një ‘match point’.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
