.png)
Në Gjirokastër është duke u zhvilluar Festivali Mbarëkombëtar i Teatrit “Mjeshtrat e mëdhenj të skenës”. Edicioni i këtij viti është i treti dhe i kushtohet aktorit të skenës dhe ekranit, “Artistit të Popullit” Ndrek Luca.
Festivali “Mjeshtrat e mëdhenj të skenës”, është organizuar nga bashkia Gjirokastër, me mbështetjen e Ministrisë së Kulturës. Shtatë janë trupat teatrore që do të interpretojnë. Përveç trupave nga Shqipëria, në festival merr pjesë edhe teatri “Muharrem Qena”, i Mitrovicës.
Sipas drejtorit artistik, Kudret Alikaj, ky edicion i festivalit, përgjatë një jave, sjell më shumë risi për sa i përket trupave pjesëmarrëse dhe cilësisë artistike. Festivali Mbarëkombëtar zhvillohet në mjediset e rikonstruktuara të teatrit “Zihni Sako”, i cili tashmë ofron kushte bashkëkohore për organizime të tilla.
Kryetari i bashkisë, Flamur Golemi, pohon se në këtë stinë vjeshte, do të vazhdojë një kalendar i larmishëm aktivitetesh, të cilat do ja shtojnë gjallërinë Gjirokastrës. “Bashkia do të mbështesë aktivitetet në fushën e artit dhe kulturës”, është shprehur kryebashkiaku Golemi.
Teatri i Durrësit përfaqësohet në këtë festival me “Martesa” nga Anton Çehov, me regji të Driada Dervishit. Regjisori i njohur Milto Kutali vjen me dramën “Buzëqeshja e hidhur”. Ledian Gjeçi, autor dhe regjisor, sjell në festivalin e Gjirokastrës, komedinë e zezë “Pak Pakt”. Një tjetër komedi është ajo e teatrit Petro Marko të Vlorës, “Darka e të marrëve”, me regji nga Roland Minga. Haqif Mulliqi, autori dhe regjisori i dramës “Kater Epoletat”, përfaqëson në këtë festival, Kosovën e veçanërisht Mitrovicën. “Çehovi i jep lamtumirën Tolstoit” vjen me regjinë e Armando Borës, ndërsa Teatri Shëtitës “Çajupi” përfaqesohet me komedinë “Kur ikën macja”, me regjinë e Kiço Londos. (ATA)
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
