.png)
Gazeta Si – Përgatitjet e kuqezinjve për Euro 2024 do të nisin në një turne miqësor, që do të zhvillohet në muajin mars në Algjeri, nga data 18 deri më 26 mars. Bëhet fjalë për një turne me 4 skuadra, ku Shqipëria është përfaqësuesja e vetme europiane dhe përveç saj dhe Algjerisë vendëse marrin pjesë edhe Afrika e Jugut dhe Bolivia.
Pjesëmarrjen e Kombëtares shqiptare në këtë turne e ka konfirmuar presidenti i Federatës Algjeriane të Futbollit, teksa fliste për eventin dhe organizimin e tij. Në ndeshjet e marsit trajneri Silvinjo do të bëjë provat e para për Europianin.
Prova gjenerale do të jenë dy ndeshje të tjera miqësore, që kuqezinjtë do t’i luajnë në fund të majit ose fillim të qershorit, para se të shkojnë në Gjermani. Kundërshtarët për këto dy miqësore nuk janë përcaktuar ende, FSHF ka kontakte me kombëtare të ndryshme.
Në total do të jenë katër ndeshje testuese, që do ta ndihmojnë trajnerin brazilian edhe për listën zyrtare të lojtarëve të grumbulluar në Euro 2024.
Shqipëria bën pjesë në grup me Spanjën, Italinë dhe Kroacinë. Ndeshja e parë e kuqezinjve është ajo me Italinë në Dortmund, në stadiumin “Signal Iduna Park’, më 15 qershor, një ditë pas startit të Europianit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
