.png)
Kryetari i Partisë Republikane, Fatmir Mediu, nuk do të jetë në protestën e 6 dhjetorit të thirrur nga Sali Berisha.
“Unë padyshim e vlerësoj që protesta është një nga elementët më të domosdoshëm politikë, në mënyrë të veçantë të opozitës. Por për protestën e 6 dhjetorit as nuk më ka pyetur kush, as më ka kërkuar njeri mendim. Por ajo që dua të them, është që protesta nuk duhet kthyer në qëllim vetvete të opozitës. Ka disa rrafshe në të cilat duhet të punojë opozita.
Meqenëse ndodhemi para një Samiti të rëndësishëm, është e rëndësishme ajo marrëdhënie që ka Partia Demokratike apo Republikane, dhe parti të tjera të opozitës, që ne, në momente të tilla duhet të kemi një qëndrim të përbashkët me partnerët tanë, me Partitë Popullore Europiane, me Partitë Konservatore Europiane, edhe me ata njerëz apo qendra vendimmarrëse europiane, në mënyrë që mos të krijojmë perceptime të gabuara të cilat mund të kthehen në disavantazh opozitar”, është shprehur ai.
Mediu tha se me 6 dhjetor do të shkojë në Washington në një takim të Internacionales Demokratike që zhvillohet në të njëjtën kohë.
“Po të më kishin pyetur, do thoja në radhë të parë që duhet patjetër të konsultoheshim me Partitë Popullore Europiane, që kanë peshën kryesore jo vetëm në PE, por në qendrat më të mëdha vendimmarrëse, në mënyrë që të mos lëmë shteg për keqinterpretime apo abuzime me aktivitetin politik opozitar”, tha Mediu.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
