Mediat amerikane, CNN dhe Washington Post, por edhe BBC shpallin fitoren e Joe Biden në zgjedhjet presidenciale.
Biden bëhet presidenti i 46-të i Shteteve të Bashkuara sipas projeksionit të CNN.
Me 20 votat elektorale të Pensilvanisë, demokrati Biden ka 273 vota elektorale, 3 më shumë nga sa duhen për të fituar (270) zgjedhjet presidenciale.
Ndërkohë Donald Trump ka 213 vota elektorale.
Biden kryeson me mbi 4 milionë vota popullore.
Ai po ashtu kryeson edhe në disa shtete të tjera ku ende nuk është shpallur fituesi: Xhorxhia (16 vota elektorale), Nevada (6 vota elektorale), Arizona (11 vota elektorale).
Ekipi elektoral i Presidentit Trump është duke vënë në pikëpyetje rezultatet, duke u shprehur nëpërmjet një deklarate të premten se “zgjedhjet nuk kanë mbaruar”. Ata thanë se presidenti përfundimisht do të fitojë si rezultat i rinumërimeve të pritshme në shtetet ku gara është e ngushtë, si dhe prej sfidave ligjore të bazuara në akuza të paprovuara për vjedhje votash dhe parregullsi.
Në sistemin amerikan të demokracisë indirekte, fituesi i votës popullore në secilin shtet – me përjashtim të shteteve Mein dhe Nebraska – merr të gjitha votat elektorale të shtetit në fjalë, të cilat përcaktohen në bazë të nivelit të popullsisë.
“Amerikë, jam i nderuar që më zgjodhe mua për të udhëhequr këtë vend madhështor. Puna përpara nesh do të jetë e vështirë, por të premtoj një gjë: Do të jem president i gjithë amerikanëve, pavarësisht nëse votuan për mua apo jo. Do ta mbaj besimin që kemi vendosur mbi mua”, tha Biden pas lajmit se mori Pensilvaninë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
