.png)
Franca, Islanda, Norvegjia, Zvicra dhe Mbretëria e Bashkuar panë rritje të varfërisë së fëmijëve midis 2014-2021, ndërsa Letonia, Lituania, Polonia dhe Sllovenia patën reduktimet më të mëdha, sipas Raportit të fundit të UNICEF-it për nivelet e varfërisë së fëmijëve.
Në raport u zbulua se Polonia dhe Sllovenia po ecin më mirë në përpjekjet për të trajtuar varfërinë e fëmijëve, të ndjekur nga Letonia dhe Koreja. Nga ana tjetër, disa nga vendet më të pasura në raport janë duke mbetur prapa.
Pavarësisht uljes së përgjithshme të varfërisë me gati 8 për qind në 40 vende midis 2014 dhe 2021, ka ende mbi 69 milionë fëmijë që jetonin në familje që fitonin më pak se 60 për qind të të ardhurave mesatare kombëtare deri në fund të vitit 2021.
“Ndikimet e varfërisë tek fëmijët janë të vazhdueshme dhe të dëmshme”, thotë drejtori i zyrës globale të kërkimit dhe parashikimit në UNICEF, Bo Viktor Nylund.
Ai thotë se për shumicën e fëmijëve kjo do të thotë se ata mund të rriten pa ushqim të mjaftueshëm rroba, pajisje shkollore ose një shtëpi të ngrohtë.
“Kjo pengon përmbushjen e të drejtave dhe mund të çojë në shëndet të dobët fizik dhe mendor.”
Pasojat e varfërisë mund të zgjasin gjithë jetën. Fëmijët që përjetojnë varfëri kanë më pak shanse për të përfunduar shkollën dhe fitojnë paga më të ulëta si të rritur. Në disa vende, një person i lindur në një zonë të privuar ka të ngjarë të jetojë tetë deri në nëntë vjet më pak se një person i lindur në një zonë të pasur, sipas raportit.
Raporti thekson gjithashtu pabarazitë e mëdha në rreziqet e varfërisë. Në 38 vende me të dhëna të disponueshme, fëmijët që jetojnë në një familje me prindër të vetëm kanë mbi tre herë më shumë gjasa të jetojnë në varfëri sesa fëmijët e tjerë. Fëmijët me aftësi të kufizuara dhe me prejardhje të pakicave etnike/racore janë gjithashtu në rrezik më të lartë se mesatarja.
Sipas gjetjeve, nga viti 2012 deri në vitin 2019 u shënua një rritje ekonomike e qëndrueshme midis këtij grupi vendesh, duke paraqitur një mundësi për t’u rikuperuar nga ndikimet e recesionit 2008-10. Megjithatë, ndërsa një numër vendesh reduktuan varfërinë e fëmijëve gjatë kësaj kohe, disa nga vendet më të pasura panë rëniet më të mëdha. Raporti tregon gjithashtu se vendet me nivele të ngjashme të të ardhurave kombëtare, si Sllovenia dhe Spanja, kanë dallime të mëdha në normat e varfërisë së fëmijëve të tyre, përkatësisht 10 për qind dhe 28 për qind.
Kushtet e jetesës së fëmijëve mund të përmirësohen pavarësisht nga pasuria e një vendi, thekson raporti. Për shembull, Polonia, Sllovenia, Letonia dhe Lituania, jo ndër vendet më të pasura të OECD dhe BE, kanë arritur reduktime të rëndësishme të varfërisë së fëmijëve, -38 për qind në Poloni dhe -31 për qind në vendet e tjera. Ndërkohë, pesë vende me të ardhura më të larta, Mbretëria e Bashkuar (+20 për qind) dhe Franca, Islanda, Norvegjia dhe Zvicra (rreth +10 për qind) panë rritjen më të madhe të numrit të fëmijëve që jetojnë në familje që përjetojnë vështirësi financiare që nga 2014.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
