Disa orë përpara mbajtjes së manifestimit, presidenti Ilir Meta ka publikuar një videomesazh të veçantë duke u shfaqur nga oborri i Presidencës me Kushtetutën në dorë dhe me një tufë mimozash në duar. “Kushtetuta e popullit po pret popullin e Kushtetutës”, shprehet kreu i shtetit, pak para se të nisë në orën 17:00 manifestimi për mbrojtjen e Kushtetutës, nga ajo që ai e ka quajtur grushti i shtetit për të cilin akuzon qeverinë. “Të dashur motra e vëllezër, Kushtetuta e popullit po pret popullin e Kushtetutës. Edhe pak momente na ndajnë nga nisja e pranverës kuqezi. Mirësevini të gjithë”, thekson presidenti. Kreu i shtetit e organizoi këtë manifestim pikërisht më 2 mars në ditën e Besëlidhjes së Lezhës.
Me anë të një postimi në rrjetet sociale, Meta më herë shkruante se “Heroi ynë kombëtar Gjergj Kastrioti Skënderbeu, siç me të drejtë ka thënë Fan Noli, do të mbetet shqiptari më i gjallë ndër të gjallët, figura më shpëtimtare dhe më frymëzuese për mbijetesë e kombit tonë, që testament na ka lënë domosdoshmërinë e bashkimit në momentet më të rrezikshme të ekzistencës së kombit tonë”.
“Sot në përkujtim të ngjarjes historike të Besëlidhjes së Lezhës, unifikimit kombëtar përballë rrezikut të asimilimit e shkombëtarizimit, mesazhi që na sjell nga historia, uroj të na ndihmojë ne të gjithëve për reflektuar, për t’u ngritur dhe bashkuar sa nuk është vonë, në një Besëlidhje të re, po aq të fortë e gjithëpërfshirëse, përballë një rreziku të ri pushtimi nga një sekt mafioz, pa fe, pa familje, pa atdhe, që ka marrë peng të ardhmen e çdo shqiptari! Zëri i popullit është zëri i Zotit! Erdhi koha të dëgjohet sa më fort! Mirësevjen BESËLIDHJA E RE me Pranverën Kuqezi!”, shkruan presidenti në rrjetet sociale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
