Me një vendim të papritur, Maqedonia e Veriut u ka ndaluar te shtunen hyrjen të gjithë punëtorëve sezonale shqiptarë.
Autoritetet e vendit fqinj kanë mbyllur zyrtarisht kufirin nga Qafë-Thana për punëtorët sezonalë. Lajmi u bë i ditur të premten pasi mbi 50 shqiptarë të cilët do të shkonin drejt shtetit fqinj për punë sezonale, nuk janë lejuar nga autoritetet maqedonase të kalojnë doganën e Qafë-Thanës. Ndërkohë mëngjesin e te shtunës pala maqedonase nuk u ka lejuar hyrjen 150 punonjësve shqiptarë.
Qeveria e vendit fqinj nuk ka dhënë ende një arsye zyrtare, por sipas mediave, vendimi për mbylljen e kufirit lidhet me vdekjen e një shqiptari në Maqedoninë e Veriut.
Sipas raporteve, bëhet fjalë për një punëtor sezonal shqiptar që ka humbur jetën të enjten gjatë një aksidenti në punë. Identiteti i viktimës nuk dihet ende. Mediat thonë se për këtë arsye, punëtorët shqiptarë që hyjnë në mëngjes dhe largohen nga territori i Maqedonisë së Veriut në mbrëmje, nuk u lejuan të hyjnë sepse ata punojnë ilegalisht.
Pas mbylljes së kufirit për punëtorët sezonalë, pala shqiptare është takuar me atë maqedonase për të diskutuar për këtë situatë dhe për kohëzgjatjen e këtij vendimi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
