Ndërkombëtarët janë vënë në lëvizje menjëherë pas vendimit të opozitës shqiptare për djegien e mandateve të deputetëve, duke u shprehur kundër kësaj lëvizjeje.
Pasditen e sotme, ambasadori i Britanisë së Madhe, Duncan Norman ka shkuar në zyrën e Lulzim Bashës ku temë e bisedës ka qenë pikërisht kjo çështje.
Takimi vjen një ditë pas vendimit të opozitës për të djegur mandatet e deputetëve në shenjë proteste ndaj qeverisë së Edi Ramës.
Ditën e protestës, në 16 shkurt, ambasadori britanik bëri thirrje që tubimi të jetë paqësor dhe të shmangen aktet e dhunës. Edhe gjatë ditës së hënë pati disa reagime nga zyrtarë të lartë të Bashkimit Europian.
Në fakt, Norman është diplomati i parë deri tani që është takuar me Bashën në zyrën e këtij të fundit, teksa më herët ambasada amerikanë në Tiranë ka fshikulluar opozitën, ku përmes një deklarate e ka cilësuar të gabuar djegien e mandateve parlamentare.
Në fakt, lëvizjet e para nisën që dje, por jo në krahun opozitar. Teksa Lulzim Basha me aleatët e tij konfirmuan se do të bëhen bashkë me popullin kundër Edi Ramës deri në largimin e tij dhe konfigurimin e një qeverie tranzitore, dy përfaqësuesit e ndërkombëtarëve, ambasadori i BE-së Luigi Soreca dhe zv/ambasadorja amerikane Leyla Moses-Ones kanë shkuar në Kryeministri për të diskutuar me Ramën. Një takim I ngjashëm që duhej të ishte zhvilluar edhe me Bashën, por që deri më tani nuk ka ndodhur.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
