Konkurrenca për të ringjallur telefonat me palosshëm, por këtë herë me një version të përditësuar çoi në dështim njëra pas tjetrës disa kompani të mëdha të prodhimit të celularëve.
E fundit që njoftoi shtyrjen e datës së hedhjes në treg të një telefoni të tillë ishte “Motorola”. Kompania po përpiqet që të risjellë në treg modelin Razr, që për herë të parë e prodhoi në 2004. Në 2006, Razr ishte një prej telefonave më të shitur, por më vonë ashtu si telefonat e tjerë me tastierë fizike u “ekzekutua” nga iPhone i Apple.
Sot, 6 vite nga mbyllja e prodhimit të telefonave Razr dhe pas ndërrimit të disa pronarëve, “Motorola” njoftoi se do ta rikthejë modelin e telefonit legjendar, por me ndryshime që e përshtasin me kohë. Ndryshimi i parë ishte se telefoni nuk ka tastierë fizike, por është i gjithë ekran që paloset.

Marrja e porosive për këtë telefon ishte planifikuar për më 26 dhjetor. Por, kompania njoftoi këtë të hënë se e ka shtyrë pa afat hedhjen në treg për çmimin e majmë prej 1500 dollarë të këtij telefoni. Si arsyetim është dhënë fakti se “ka patur shumë kërkesa”.
Arsyetimi në fjalë nuk duket fort i besueshëm, duke u nisur nga fakti që përgjatë këtij viti dy kompanit të tjera patën probleme teknike dhe më pas dështuan në tregun e telefonave të palosshëm.
Fillimisht ishte Samsung, që në muajin prill hodhi në treg telefonin “Fold”, por që u godit nga raportimet e shumta të përdoruesve se u ishte thyer ekrani pak ditë pasi e kishin blerë. Për të mos përsëritur gabimin e kompanisë koreano-jugore, kinezët e Huawei shtynë pa afat datën e nxjerres së variantit të tyre të telefonit të palosshëm Huawei Mate X.
Ekspertët teknologjikë thonë se vështirësitë e kompanive për të prodhuar një telefon inteligjent me ekran të palosshëm lidhen kryesisht me mungesën e aplikacioneve që të përshtaten me ekranin sa herë që ai hapet dhe mbyllet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.