Gazeta Si – Në ditën e pestë radhazi, me gjithë ndërhyrjen e dy avionëve të ardhur nga Greqia, vijon beteja me zjarrin në malin e Çikës në Vlorë.
Dy avionët “Canadair” të ardhur nga Selaniku, megjithëse kanë punuar mbrëmjen e të enjtes prej disa orësh nuk ia kanë dalë të shuajnë flakët.
Mëngjesin e kësaj të premteje po ndërhyjnë forcat e zjarrfikëse dhe ushtarët për të siguruar edhe terrenin.
Ndërkohë, nga prefekti i qarkut të Vlorës, Flamur Mamaj, bëhet me dije se do të ketë ndërhyrje edhe sot nga avionët grek për shuarjen e flakëve.
Flakët po avancojnë në drejtimin e Dhërmiut dhe Himarës, por rreziku mbetet ende larg.
Ushtarët e Forcave të Armatosura janë larguar nga terreni, pasi përplasja e ujit që hidhet nga lart bën që shkëmbi i nxehur nga temperaturat e zjarrit të krijojë çarje (shpërthim), duke shkaktuar rrezik për ta.
Ndërkohë, që në pjesën jugore të malit të Çikës, janë djegur rreth 80 hektarë pyje me bredha dhe shkurre në një vijë 500 metra nga zona mbi fshatin Palasë në afërsi të majës së malit.
Megjithatë, sipas autoriteteve lokale, situata paraqitet më e përmirësuar pas ndërhyrjes së avionëve grekë.
Tymi i zjarrit në malin e Çikës u përhap fshatin bregdetar të Dhërmiut, duke krijuar probleme për pushuesit. Disa prej tyre mësohet se janë larguar mbrëmjen e së mërkurës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
