Lojtarët e Iranit nuk këndojnë himnin, i bashkohen kauzës së popullit

Gazeta Si – Gjest sinjifikativ i kombëtares iraniane para ndeshjes me Anglinë. Një ditë më parë kapiteni Hajsafi mbështeti hapur revoltën në vendin e tij.

Protesta e tifozeve iraniane ne stadium. Gazeta Si, 21 nentor 2022

Të heshtur, me duart mbi shpatullat e shokëve, ndërkohë që në stadium dëgjohej himni i Iranit. Lojtarët iranianë nuk kënduan në shenjë proteste ndaj regjimit. Nuk është si grushti i Tomi Smith dhe Xhon Karlos në qytetin e Meksikos, por gjithsesi do të mbetet në histori.

Lojtarët e Iranit qëndruan të palëvizshëm gjatë himnit, një sfidë e tyre ndaj regjimit, pa asnjë lloj frike. Në shkallët e stadiumit dikush po qante, ndërsa në stol vetëm një nga asistentët e Keiroz lëvizte buzët. Publiku vërshëllente për t’ia bërë të qartë ayatollahut nga cila anë është.

Iran fans in Qatar chanted the name of Mahsa Amini ahead of their #FIFAWorldCup match against England.

They also chanted in support of Ali Karimi, the former Iranian footballer who backed the protests that started after Mahsa Amini’s death in police custody ⤵️ pic.twitter.com/o5UjRQFYso
— Al Jazeera English (@AJEnglish) November 21, 2022

Protesta kishte nisur jashtë stadiumit, me tifozët iranianë që bënin homazh për Masha Amini, të renë e vrarë nga policia iraniane pas arrestimit me akuzën se nuk kishte veshur hixhabin. Një ngjarje që solli shpërthimin e protestave në gjithë vendin dhe dhunën e regjimit, duke shkaktuar mbi 400 të vdekur.

Tifozët jashtë stadiumit thirrën në kor edhe emrin e Ali Karimit, ish-lojtarit të njohur iranian që është rreshtuar në favor të revoltës.

Më shumë zhurmë shkaktuan fjalët e kapitenit Ehsan Hajsafi, i cili para ndeshjes me Anglinë u shpreh: “Ne lojtarët jemi në krahun e atyre që kanë humbur jetën. Duhet të pranojmë faktin se kushtet aktuale në Iran nuk janë të drejta dhe populli ynë nuk është i kënaqur. Dua t’u shpreh ngushëllime të gjitha familjeve që janë në zi, dua ta dinë se jemi me ta dhe se i mbështesim në kauzën e tyre”.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.