.png)
Nga Gazeta Si – Lea Ypi, një prej personazheve më të përfolur muajt e fundit me librin e saj “Të lirë” ka rrëmbyer çmimin “Lumo Skendo” për vitin 2021 si libri më i mirë.
Çmimi për këtë libër iu akordua për vlerat e shquara në trajtesën origjinale, artistike e filozofike të konceptit të lirisë në kohën e diktaturës komuniste dhe të tranzicionit demokratik në Shqipëri, nëpërmjet kujtimeve të fëmijërisë dhe adoleshencës, dhënë me vërtetësi, sinqeritet, ndjeshmëri, humor, meditim politik e filozofik bashkëkohor.
Çmimi iu dorëzua nga ministrja e Kulturës, Elva Margariti, e cila ishte e pranishme në ceremoninë e dhënies së çmimit.
Në këtë libër autorja Lea Ypi sjell kujtimet e fëmijërisë dhe adoleshencës, të cilat janë vlerësuar se përcjellin vërtetësi, sinqeritet, ndjeshmëri, humor dhe meditim politik.
Në garën për çmimin “Lumo Skëndo” ishin dhe autorë si Fatos Lubonja me librin e tij të fundit “Jetë burgu”, Rubens Shima me “Posteri shqiptar”, Fatmir Toçi me “Arbëreshët” dhe Kujtim Shala me “Zbulimi i Zef Pllumit”.
Juria për çmimin “Lumo Skëndo”, për vitin 2021 përbëhej nga Uran Butka, Drejtor i Institutit të Studimeve “Lumo Skëndo”; Piro Misha, Drejtor i Bibliotekës Kombëtare të Shqipërisë; Dhurata Shehri, zv/dekane e Fakultetit të Gjuhës dhe Letërsisë, Belina Budini, Dekane e Fakultetit të Shkencave Humane, UET dhe Dorian Koçi, Drejtor i Muzeut Historik Kombëtar.
Të pranishëm në ceremoni ishin një sërë figurash të shquara nga fusha e letrave shqipe si dhe ambasadorja amerikane në Tiranë, Yuri Kim.
“Të lirë” e Lea Ypit u përzgjodh edhe për çmimin prestigjioz Baillie Gifford për letërsinë jo-fiction.
Recensione për këtë libër janë botuar edhe në mediat e huaja si “The Guardian”, “The Times” apo “Financial Times”, ndërsa në Tiranë u promovua nëntorin e shkuar në vilën e ish-diktatorit shqiptar Enver Hoxha, në një nga sallat e pritjes, të cilën Lea do ta cilësonte si kurorëzimin e një ëndrre.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
