.png)
Gjatë interpelancës për Maturën Shtetërore në parlament, Ministrja e Arsimit dhe Sportit Evis Kushi bëri një analizë të Maturës Shtetërore 2021, si dhe nënvizoi masat e marra për mbarëvajtjen e Maturës Shtetërore 2022.
Reagimet e vitit të kaluar për provimin e matematikës dhe pakënaqësia e maturanteve çuan në reflektimin e ministrisë tha ajo. Kushi shpjegoi se është bërë një analizë e shpejtë nga ekspertët e arsimit dhe pas vlerësimit të shqetësimeve për të gjitha testet, si dhe duke marrë parasysh edhe vështirësitë e pandemisë, me vendim unanim të Komitetit të Maturës Shtetërore u vendos për uljen e kufirit minimal të kalueshmërisë dhe atë të pikëve për çdo notë.
Kushi theksoi se pavarësisht problematikave dhe sfidave më të cilat u përballën, kalueshmëria në të gjitha lëndët ishte shumë e lartë, mbi 98%.
Ajo shtoi se aplikimi i metodës së korrigjimit të pyetjeve me alternativa nëpërmjet sistemit elektronik eliminoi gabimet njerëzore, si dhe shkurtoi kohën dhe rritjen e cilësisë së korrigjimit.
Gjatë interpelancës, deputetja e Partisë Demokratike, Ina Zhupa, u shpreh se duhen më shumë fonde për arsimin dhe kryesisht për të korrigjuar testet në mënyrë që të mos ketë një përsëritje të viteve të shkuara.
“Duhet të investojmë në arsim që të marrim nga arsimi. Sepse kur alokon para në arsim merr mbrapsht nga arsimi një brez më të informuar dhe më të edukuar”, shtoi Zhupa.
Deputetja shtoi se e rëndësishme është, edhe distanca e provimeve, e cila nuk vendoset kur mendohet, por duhen studime se sa kohë i duhet një nxënësi për provimet.
Ndërsa Ministrja Kushi shtoi se, që prej muajit shtator, Komiteti i Maturës Shtetërore (KOMSH), ka punuar në mënyrë intensive për Rregulloren e vitit 2022, e cila u prezantua në muajin shkurt gjatë një takimi me maturantë nga i gjithë vendi.
Ministrja tha se risi për këtë vit është se procesi i vlerësimit të testeve do të mbikëqyret, edhe nga grupe pune të ngritura nga MAS, duke garantuar cilësi më të lartë vlerësimi.
Së bashku me QSHA, edhe në javët në vazhdim do të organizohen takime informuese, ndërgjegjësuese, këshilluese, me maturantë por edhe mësues dhe drejtues të institucioneve arsimore, për të garantuar që rregullorja të njihet dhe zbatohet siç duhet.
Gjatë analizës Ministrja Kushi tha se nga viti i kaluar u konstatua që hartimi i testit ishte aspekti më problematik i të gjithë procesit.
“Këtë vit është vendosur që hartimi i fondit të pyetjeve të kryhet në kushte shumë të larta sigurie për çdo test përfundimtar të lëndëve, printimin, shumëfishimin dhe paketimin e tyre”,shtoi Ministrja.
Sipas Kushit grupi i hartuesve të testeve do të jetë i përbërë nga mësues me përvojë, me integritet të lartë të përzgjedhur sipas një procesi të hapur dhe transparent do të punojnë për formulimin e pyetjeve.
Kushi tha se diplomat e Maturës Shtetërore këtë vit do të lëshohen deri në 5 korrik për maturantët që do të studiojnë jashtë vendit, si dhe deri në 15 korrik për të gjithë maturantët”, tha ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
