Gazeta Si – Gjashtë persona janë arrestuar dhe një i shtatë është proceduar penalisht në gjendje të lirë në Durrës pasi filmonin njëri-tjetrin duke qëlluar me kallashnikov dhe videot i publikonin në TikTok.
Policia tha se në pranga ranë M.S. 19 vjeç dhe babai i tij Nj.S. 56 vjeç nga fshati Rrushkull për armëmbajtje pa leje, K.P. 19 vjeç, K.J. 20 vjeç, A.T., 18 vjeç, A.H., 19 vjeç dhe E. T., 19 vjeç, të gjithë banues në Tiranë, për veprën penale “Moskallëzimi i krimit”.
Ndërsa i proceduari në gjendje të lirë është një 17-vjeçar për “moskallëzim krimi”.
7 të rinjtë e arrestuar/proceduar u kapën në flagrancë teksa po përgatiteshin për të qëlluar në kodrën e fshatit Hamallaj, me armë zjarri që i posedonin pa leje, me qëllim postimin e videove në rrjetin social “TikTok”.
Gjatë operacionit u gjet arma e zjarrit kallashnikov me të cilën të rinjtë kryenin qitje. Në vijim, gjatë kontrollit në banesën e shtetasve Nj. S. dhe M. S., ku u kap 56-vjeçari, Policia gjeti dhe sekuestroi një armë zjarri pushkë dhe municion luftarak. Së bashku me armët, u sekuestruan 2 automjetet me të cilat lëviznin këta shtetas, si dhe 8 celularë.
Për këtë ngjarje reagoi edhe ministri i Brendshëm Taulant Balla, i cili tha se policia ka shtuar monitorimin në rrjetet sociale ku ekspozohen rastet e armëmbajtjes pa leje nga të rinjtë.
“Armëmbajtja pa leje nga të rinjtë, ekspozimi i armëve në rrjete sociale, kërkojnë angazhim maksimal të Policisë së Shtetit, për evidentimin dhe goditjen e tyre. Përgëzime Policisë së Shtetit Durrës, e cila përmes monitorimit të rrjeteve sociale ka identifikuar shtatë persona në moshë të re si posedues armësh zjarri”, u shpreh ministri Balla.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
