Dy makinat Ferrari u përplasen me njëra-tjetrën që në xhiron e parë në pistën e Spielbergut në Austri. Një gabim trashanik i Leklerk që është shoqëruar me kritika të ashpra nga ish-pilotë apo ish-drejtues të skuderisë italiane.
Zhan Alesi, ish-pilot i Ferrarit, duke analizuar përplasjen e Leklerk dhe Fetel, thekson: “Ishte një figurë e shëmtuar, dihet që kur nisesh nga vendet e pasme ka gjithmonë rrezik për t’u prekur me makinat e tjera. Më shumë se presioni mbi pilotët, fakt është se makina është ndërtuar keq dhe paraqitja e dobët peshon shumë, sepse zgjidhjet e teknikëve nuk funksionojnë. Në këtë rast pilotët nuk kanë faj. Ky kampionat nuk do të sjellë rezultat, pasi makinat nuk premtojnë, por Ferrari i ka mundësitë dhe burimet për t’u ringritur.”
Një qëndrim më të ashpër ka Flavio Briatore, i cili shprehet se pilotët duhen gjobitur për atë gafë dhe se kjo është e vetmja mënyrë që ata të jenë më të përgjegjshëm. “Gabimin këtë radhë e bëri Leklerk, i cili deshi të depërtonte në një vrimë ku nuk kishte hapësirë. Fetel e di që do të largohet dhe nuk do ta ndihmojë kolegun e tij, por Sebastiani nuk mendonte se dikush do ta sulmonte në atë mënyrë, – shprehet menaxheri i njohur italian.
“Pas 300 metrash, dy makina që nuk janë më në pistë, është një katastrofë. Duhen respektuar inxhinierët, mekanikët dhe të gjithë pjesëtarët e skuadrës. Në atë pozicion nuk kishte sens që të rrezikohej, duhet pak disiplinë, sepse makinat nuk janë të pilotëve, por të skuadrës. Këta djem duhet të respektojnë punën e gjithë skuadrës dhe unë do t’i kisha gjobitur me 5-10% të pagës. E vetmja mënyrë për t’i bërë më të përgjegjshëm, është t’i prekësh te lekët”, – thotë Briatore.
Burimi: Gazzetta dello Sport/ Përktheu: Gazeta Si
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
