Shtetasi rus, pjesë e stafit të misionit të Organizatës së Kombeve të Bashkuara në Kosovë, i cili u arrestua nga policia gjatë aksionit në Veri të Mitrovicës është shpallur person “non grata” nga qeveria e Prishtinës.
Mikhail Krasnoshchenkov u arrestua pranë komunës me shumicë serbe të Zubin Potokut. Policia e Kosovës tha se shtetasi rus kishte penguar operacionin e forcave speciale të Policisë, gjatë së cilit kishte paraqitur edhe dokumentacionin si pjesë e misionit UNMIK.
Vendimin për shpalljen e tij “non grata” e njoftoi Kryeministri i Kosovës, Ramush Haradinaj.
“Vendimi është marrë sot ndaj këtij personi që punon si staf ndërkombëtar në Kombet e Bashkuara, dhe të njëjtit i urdhërohet që ta lëshojë territorin e Republikës së Kosovës. Ky vendim ka hyrë në fuqi, sot nga 31 maj 2019”, shkruan Haradinaj në rrjetet sociale.
Kryeministri i Kosovës kërkon prej përfaqësisë së OKB-së në Prishtinë që të respektojnë vendimin dhe kujtojnë se me veprimet e veta, shtetasi rus ka kundërshtuar rendin kushtetues të Kosovës.
Një ditë më parë, ministri i Jashtëm i Kosovës, Behgjet Pacolli tha se do të ushtronte të gjitha kompetencat që i jepte ligji dhe Kushtetuta e vendit për të mos lejuar hyrjen në Kosovës të Kryeministres serbe, Ana Brnabiç. Vendimin e justifikoi me deklaratat raciste të Brnabiç, e cila gjatë një aktiviti në Beograd, edhe në prani të ambasadorit të BE-së në Serbi i cilësoi shqiptarët “njerëz të trashë”.
Në lidhje me deklaratën e Brnabiç ka reaguar edhe zëdhënësja e Komisionit Europian, Maja Koçijançiç. Ajo thotë se gjuha raciste dhe epitete ofenduese nuk ndihmojnë në uljen e tensioneve mes dy vendeve dhe shtoi se Komisioni bën thirrje për vetëpërmbajtje e distancim nga deklarata e paragjykime të tilla.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
