Kontratat që skadojnë dhe mijëra vende pune në rrezik, Hollywood po përgatitet për grevë

Hollivudi është një hap larg kthimit në izolim, por këtë herë pandemia e Covid-it nuk ka asnjë lidhje me të. Sindikatat e autorëve të televizionit dhe filmit kanë paralajmëruar grevë që mund të zbatohet në çdo moment pas skadimit të kontratës aktuale, e cila përfundon më 1 maj. Përfaqësuesit e kategorisë, të lidhur me “Writers Guild of America”, kanë më shumë se nëntë mijë anëtarë, të cilët votuan me 98 për qind për “po”.

Hollywood, i shkatërruar nga një pandemi trevjeçare, nuk mund të përballojë të ndalojë përsëri, por prodhuesit duhet të vendosin më shumë dollarë në tavolinë nëse duan përmbajtje cilësore dhe origjinale.

Autorët kundërshtojnë kompensimin në një botë ku fitimet e aktorëve, regjisorëve dhe producentëve shumëfishohen. Vitet e fundit shumë skenaristë janë përdorur si makineri, janë shtrydhur dhe përdorur.

Tani kanë thënë mjaft. Në rrezik janë pjesa më e madhe e prodhimit kinematografik dhe serialeve televizive, programe kulti si “Saturday Night Live” dhe talk show të drejtuar nga Stephen Colbert, Jimmy Fallon dhe Jimmy Kimmel. Nga ditët e para të majit, nëse nuk ka një marrëveshje të minutës së fundit, gjithçka është e mundur.

Dhe kjo pasiguri shtohet edhe më tej: Disney po shkurton 7000 vende pune. Warner Bros. Discovery përballet me vështirësitë financiare të një borxhi prej 50 miliardë dollarësh. Autorët kërkojnë që ata të mos përballojnë gjithmonë kostot e krizës.

Ata duan të paguhen. Dy javë që kanë mbetur deri në skadimin e kontratës, ka pak shenja për një rifillim të mundshëm të negociatave. Në një e-mail dërguar abonentëve dhe të firmosur nga komisioni sindikal, Studiot akuzohen se “nuk kanë ofruar përgjigje domethënëse për çështjet qendrore” dhe se kanë dhënë vetëm lëshime të vogla.

Producentët janë të zemëruar. Aleanca e Prodhuesve të Filmave dhe Televizionit, përfaqësuesi më i madh i bosëve të Hollivudit, tha se nuk ishte i befasuar nga njoftimi i grevës.

“Gjithmonë ka qenë synimi i tyre, – kanë komentuar me shkrim, – e kishin bërë të ditur edhe para se palët të hidhnin propozimet në tavolinë”. “Qëllimi ynë, - shtuan ata, - është të gjejmë një marrëveshje, e cila është e mundur vetëm nëse sindikata merr përsipër të përqendrohet, duke filluar diskutimet për të gjitha çështjet dhe duke kërkuar kompromise të arsyeshme”.

Askush nuk kishte dyshime për mungesën e befasisë nga ana e Studios: me afrimin e skadimit të kontratës, producentët u kishin kërkuar punonjësve të rrisin ritmin e punës. Skenat dhe skenarët janë grumbulluar gjatë javëve të fundit, për të parashikuar ndonjë bllokim. Por shqetësimi mbetet.

David Zaslav, president i Warner Bros. Discovery, kompania që zotëron studiot televizive dhe HBO, pranoi se një “grevë do të paraqesë një sfidë për të gjithë industrinë”. Hera e fundit që autorët hynë në grevë ishte në vitin 2007. Kjo mbyllje çoi në një paralizë prodhimi 100-ditore: 37,000 vende pune u humbën dhe ekonomia e Los Anxhelosit humbi më shumë se dy miliardë dollarë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.