.png)
Qeveria shqiptare duhet të bëjë publike komunikimet me UNESCO-n gjatë kryerjes së procedurave për dhënien me koncesion të Parkut të Butrintit.
Kjo është e vetmja kërkesë e deputetes demokrate Ina Zhupa që u pranua në seancën e zhvilluar të martën në Gjykatën Kushtetuese.
Seanca e re në Kushtetuese në lidhje me këtë çështje do të caktohet pas datës 25 korrik.
Zhupa pretendon se qeveria ka mashtruar UNESCO-n gjatë komunikimeve për Parkun e Butrintit.
“Ky është një mashtrim që i çohet UNESCO-s nga shteti shqiptar vetëm për të thënë që ne nuk e shkelur konventën e Parisit. E gënjejnë dhe përveç kësaj ata kanë një vit e gjysmë që nuk sjellin dokumente as mua dhe as Gjykatës Kushtetuese. Kërkesa jonë do të jetë detyrimi i qeverisë për të sjellë të gjithë dokumentacionet që lidhen me UNESCO-n para se të vendoset koncesioni i Butrintit në Kuvend. Nuk mund të hyjmë në një gjykim duke na fshehur të vërtetat. Është e rëndësishme që Gjykata Kushtetuese të jetë e bindur 100% në shkeljet e Kushtetutës.
Butrinti nuk është pasuria jonë por e gjithë shqiptarëve. Kjo është një betejë përtej politikës dhe na takon të gjithëve si shqiptarë. Kërkesa e dytë është në lidhje me thirrjen e dëshmitarëve për Butrintin. Gjykata duhet të dëgjojë ata që kanë qenë pjesë e vendimmarrjes...” tha Zhupa për mediat.
Kuvendi miratoi kohë më parë me shumicë votash marrëveshjen për menaxhimin e Parkut Kombëtar të Butrintit nga fondacioni shqiptaro-amerikan AADF, në të cilën bën pjesë edhe shteti.
Marrëveshja synon zhvillimin e Parkut të Butrintit, dhe kthimin e tij në një pikë të rëndësishme turistike. Fondacioni për menaxhimin e Butrintit krijohet në partneritet me Fondacionin jo shtetëror Shqiptaro-Amerikan për Zhvillim (AADF) dhe do të përbëhet nga 5 anëtarë, 2 prej të cilëve nga Ministria e Kulturës, 2 të tjerë nga partneri strategjik AADF, ndërsa një i pestë është arkeologu i huaj britanik Richard Hodges. Kontributi fillestar financiar i partnerit strategjik është 5 milionë dollarë, ndërsa ai i Ministrisë së Kulturës, 2 milionë dollarë.
Kjo marrëveshje është kundërshtuar nga opozita, ndërsa deputetja Ina Zhupa e ka ankimuar në Kushtetuese.
Kërkesat e Ina Zhupës drejtuar Kushtetueses
1. Të gjitha komunikimet zyrtare mes shtetit shqiptar me UNESCO, që lidhen me koncesionin e Butrintit;
2. Thirrja e dëshmitarëve për çështjen, ekspertë të fushës dhe njohës të Trashëgimisë Kulturore të Butrintit;
3. Thirrjen e fondacionit shqiptaro-amerikan;
4. Moslegjitimimi i fondacionit për menaxhimin e Butrintit, si i pabazuar në ligj;
5. Pezullimin e vënies në zbatim të ligjit;
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
