.png)
Në auditimin e tij më të fundit Kontrolli i Lartë i Shtetit vëren se që prej vitit 2014 analizat për kontrollin e barnave janë ulur ndjeshëm. Sipas KLSh nëse në vitin 2014 nga Laboratori i Kontrollit në Agjencinë Kombëtare të Barnave dhe Pajisjeve Mjekësore janë kryer 498 analiza mbi barnat, në vitin 2018 numri i analizave ra në 169 të tilla me një tkurrje të konsiderueshme me rreth 60% të tyre. Ndërkohë për vitin 2019 regjistrohen vetëm 68 analiza ose rreth 13.6% e analizave të realizuara në vitin 2014
“Analiza e fundit në këtë sektor regjistrohet në muajin Tetor 2019. Pas kësaj periudhe institucioni nuk ka kryer më analiza dhe puna e sektorit në këtë drejtim bazë është paralizuar tërësisht”, shkruhet në një auditim të bërë nga KLSH.
Sipas KLSh-së “punonjësit e Laboratorit janë ngarkuar me detyra plotësuese mbi përgatitje materialesh mbi procesin e akreditimit i cili pavarësisht vlerës së shtuar që sjell, nuk justifikon moskryerjen e analizave mbi barnat, që është objekti kryesor i punës së veprimtarisë së sektorit”.
Në raport përmendet edhe se vlera e shpenzuar nga institucioni për 18 punonjësit pjesë e “Sektorit të Laboratorit të Kontrollit”, në fond page dhe kontribute të sigurimeve shoqërore dhe shëndetësore, për periudhën Janar 2019-Gusht 2020 llogaritet në vlerën rreth 26.3 milion lekë, e cila në mungesë të përmbushjes së detyrës kryesore të punës së këtij sektori në analizimin e barnave, përbën shpenzim të kryer jo në përputhje me parimet e efektivitetit, efiçencës, dhe ekonomisë së fondeve publike.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje