.png)
Ligjërisht Këshilli i Emërimeve në Drejtësi nuk emëron anëtar të Gjykatës Kushtetuese, por përzgjedh kandidaturat dhe më pas i dorëzon një listë me të paktën tre emra te Kuvendi dhe Presidenti për të përzgjedhur kandidaturën që këto institucione vlerësojnë si më të përshtatshme.
Por, për vakancën e shpallur më 24 shtator nga ana e Kuvendit dhe anëtarin e pestë të Gjykatës Kushtetuese, deputetët nuk do ta kenë të vështirë përzgjedhjen e kandidaturës më të kualifikuar, pasi KED, në listën emërore që i ka dorëzuar ka përfshirë vetëm një kandidaturë, atë të Altin Binajt.
“Pas diskutimeve miratoi (KED) vendimin për pikëzimin dhe renditjen e kandidatit të lejuar për vendin vakant në Gjykatën Kushtetuese, vakancë e parakohshme, e shpallur nga Kuvendi i Shqipërisë. KED i përcolli këto akte pranë organit të emërtesës, Kuvendit të Republikës së Shqipërisë”, thuhet në njoftimin e KED-së.
Altin Binaj e ka nisur karrierën si prokuror. Për vite me radhë ka qenë prokuror dhe drejtues i Prokurorisë në Vlorë, deri në vitin 2013 kur u emëruar në Prokurorinë e Përgjithshme për të drejtuar drejtorinë e hetimit të korrupsioni. Në 2016 u rikthye në Vlorë në krye të Prokurorisë së Apelit.
Mungesa e kandidaturave të tjera në këtë garë e bëjnë atë praktikisht anëtar të Gjykatës Kushtetuese, pasi sipas parashikimeve ligjore të bëra në kuadër të reformës në drejtësi, Kuvendi ka 30 ditë kohë që të zgjedhë një emër në tre vendet e para të listës së marrë nga KED. Në përfundim të këtij afati, emri i renditur i pari nga KED zgjidhet automatikisht anëtar i Gjykatës Kushtetuese.
Përveç garës për vakancën e shpallur nga Kuvendi, Binaj është edhe në lojë për një vakancë të shpallur nga Presidenti, së bashku me avokatin Përparim Kalo dhe shefin e kabinetit të Gjykatës Kushtetuese, Aleksandër Toma. Në vakancën e dytë të shpallur nga Presidenca, në garë është vetëm juristja Sonila Bejtja.
Vendimi i KED-së i dorëzohet Kuvendit pas thirrjes së ambasadores së SHBA në Tiranë, Yuri Kim se Gjykata Kushtetuese duhet të rikthehet funksionale brenda këtij viti.
Ambasadorja e SHBA në Tiranë Yuri Kim, e cila ka bërë thirrje për vënien në funksion të gjykatës para fundit të dhjetorit. Pavarësisht se Altin Binaj nuk ka konkurrencë në këtë proces, Kim e përgëzoi KED-në.
Në një postim në Tëitter, ambasadorja amerikane shprehet se Shqipëria këtë javë do të ketë një nga dy gjyqtarët e nevojshëm për funksionalitetit e Gjykatës Kushtetuese
“KED përfundoi vlerësimin dhe i dërgoi Parlamentit listën e kandidatëve të kualifikuar për Gjykatën Kushtetuese. Kjo do të thotë që Shqipëria do të ketë këtë javë një nga dy gjyqtarët e nevojshëm për ta bërë funksionale Gjykatën Kushtetuese. Sapo Presidenca të emërojë gjyqtarin e saj, Gjykata Kushtetuese do të jetë funksionale. Faleminderit të gjithëve për ndërmarrjen e masave urgjente!”, shkroi Kim në rrjetet sociale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
