.png)
Gazeta Si – Dritan Gjika u bë një nga figurat më të spikatura të të ashtuquajturës mafia shqiptare në Ekuador, ku ai u akuzua për pastrim parash dhe trafik ndërkombëtar të drogës në Evropë.
Shqiptari 48 vjeç me origjinë nga Shkodra, u kap të hënën, më 26 maj 2025, në Emiratet e Bashkuara Arabe, pas një operacioni të përbashkët mes policisë së të dy vendeve dhe me mbështetjen e programit PacCto 2.0.
Gjika u arrestua për qëllime ekstradimi pasi rezulton dy njoftime të kuqe nga Interpoli për trafik droge, pastrim parash dhe krim të organizuar.
Prokuroria në Ekuador pohon se Gjika dhe 20 të pandehur të tjerë kanë pastruar 31 milionë dollarë në periudhën 2015-2024.
Jeta luksoze
Gjatë këtyre viteve, ai shfaqej si një biznesmen i pasur, por përdorte kompanitë e parave për të kryer veprimtari të paligjshme dhe vepronte në zonën bregdetare.
Në Ekuador, ai bënte një jetë luksoze për t’iu shmangur dyshimeve. Kompanitë e tij zotëronin makina të nivelit të lartë, automjete të blinduara dhe prona në zona banimi. Pozicioni i tij i lejoi të krijonte lidhje me njerëz dhe zyrtarë.
Emri i shqiptarit nuk ishte i panjohur në sferën politike në Ekuador, pasi ai ishte i lidhur me Rubén Cherres, i cili akuzohej për ndërhyrje në kompani publike dhe gjoja ndërmjetësim në poste qeveritare. Cherres u vra para dy vjetësh në vitin 2023 nga një skuadër kriminale në një zonë pranë Guajakilit.
Operacioni
Në shkurt të vitit 2024 u krye një megaoperacion dhe bastisje në prona, njëra prej tyre i përkiste Gjikës, por “mbreti” i trafikut të drogës nuk ishte i pranishëm.
Organizata kriminale e drejtuar nga shqiptari Gjika, argjentinasi Mario S. dhe ekuadoriani Carlos G. dyshohet se ka kryer transaksione të pajustifikuara në shumën totale prej 31 milionë dollarësh në periudhën 2015-2024.
E ashtuquajtura çështja “Pampa”, në të cilën ky rrjet u procedua penalisht, rezultoi me dënimin e 14 personave. Çështja ndaj Gjikës është pezulluar, pasi ai ka qenë i arratisur që nga shkurti i vitit 2024.
Kapja e tij në Emiratet e Bashkuara Arabe është për qëllime ekstradimi, megjithëse autoritetet nuk kanë specifikuar se kur do të nisë procesi.
🚨 ¡𝗚𝗼𝗹𝗽𝗲 𝗶𝗻𝘁𝗲𝗿𝗻𝗮𝗰𝗶𝗼𝗻𝗮𝗹 𝗮𝗹 𝗰𝗿𝗶𝗺𝗲𝗻 𝗼𝗿𝗴𝗮𝗻𝗶𝘇𝗮𝗱𝗼!
— Ministerio del Interior Ecuador 🇪🇨 (@MinInteriorEc) May 26, 2025
𝗗𝗿𝗶𝘁𝗮𝗻 𝗚𝗷𝗶𝗸𝗮, 𝗹í𝗱𝗲𝗿 𝗱𝗲 𝗹𝗮 𝗠𝗮𝗳𝗶𝗮 𝗔𝗹𝗯𝗮𝗻𝗲𝘀𝗮 𝗲𝗻 𝗘𝗰𝘂𝗮𝗱𝗼𝗿 𝗲𝘀 𝗰𝗮𝗽𝘁𝘂𝗿𝗮𝗱𝗼 𝗲𝗻 𝗘𝗺𝗶𝗿𝗮𝘁𝗼𝘀 Á𝗿𝗮𝗯𝗲𝘀 𝗨𝗻𝗶𝗱𝗼𝘀
Este 26 de mayo de 2025, en una… pic.twitter.com/NxSaWrbwLF
Rrjetet mafioze shqiptare në Ekuador
Hetimet e para për mafien shqiptare datojnë në vitin 2009. Që nga ai vit, policia e kishte në radar Gjikën si një nga lidhjet me klanet ballkanike për dërgimin e kokainës në Spanjë.
Në Ekuador, Dritan Gjika themeloi kompani eksporti – njëra prej tyre e lidhur me bananet – dhe mbërriti në vendin amerikanolatin me një vizë të përkohshme në vitin 2009. Ai është pjesë e klanit ballkanik “Kompania Bello”, një nga 14 grupet kriminale të bashkuara të Shqipërisë.
“Mafia shqiptare ka një strukturë horizontale. Domethënë nuk ka një udhëheqës të vetëm, prandaj quhen klane familjare”. Kështu e ka shpjeguar eksperti i sigurisë në Ekuador, Renato Rivera.
Një tjetër pjesëtar i shquar i atij klani është Dritan Rexhepi, i cili u arrestua dhe u dënua në Ekuador për trafik droge. Por ai u lirua pasi kreu shtatë vjet burg, u arratis në Turqi për t’u kapur sërish dhe më pas u ekstradua në Shqipëri.
Sipas Riveras, rrjetet ballkanike kanë një interes të veçantë për Ekuadorin për shkak të afërsisë me Kolumbinë, ku rritet dhe përpunohet kokaina.
Kjo ndodh për shkak të gjendjes ekonomike të vendit, të metave në sistemin e tij gjyqësor dhe lehtësisë së tregtisë së vendit me Evropën, veçanërisht Holandën, Belgjikën dhe Spanjën.
Lidhjet me grupin famëkeq, Los Choneros
Profesori i sigurisë, tregoi se kur Gjika u ndalua dhe u dërgua në një burg në Ekuador, ai vendosi lidhje dhe kontakte me grupe kriminale lokale si Los Choneros.
Ai u bashkua me Jorge Luis Zambrano, alias Rasquiña dhe filloi të përfshihej më shumë në trafikun e drogës dhe dërgesat jashtë Ekuadorit.
Brenda rrjetit të drogës nën komandën e Gjikës, kishte personel të portit detar që vepronin si informatorë dhe ndihmonin kriminelët të fshihnin mallrat e tyre.
Metoda e përdorur për transportimin e blloqeve në kontejnerë ishte “grepi i verbër”, i cili përfshin klonimin e këtyre pajisjeve pasi ato inspektohen nga policia.
Në vitin 2020, me vrasjen e një prej bosëve të drogës, Rasquiña, Dritan Gjika filloi të drejtonte biznese të paligjshme me kontaktet e tij të trafikut të kokainës.
Ai nuk është i lidhur me një grup të vetëm, por më tepër me ofertuesin më të lartë për trafikun e drogës, tha Rivera.
Kështu, ai ndërtoi një rrjet të rëndësishëm pastrimi parash. Gjika, pasi u ndalua si shqiptari tjetër Dritan Rexhepi, u lirua në një çështje të diskutueshme gjyqësore dhe u largua nga Ekuadori.
Biznesi
Pavarësisht se autoritetet e kanë ndjekur Gjikën me asistencë ndërkombëtare, aktiviteti i biznesit të trafikantit të drogës në Ekuador nuk është zhdukur plotësisht.
Sipas faqes së internetit të Superintendency of Companies (Supercias), në tetor 2023, shqiptari themeloi një kompani të re në vend, me seli në një ndërtesë luksoze në Guayaquil. Lidhjet e Gjikës me trafikun e drogës kanë mbërritur edhe në strukturat shtetërore.
Ish asambleisti Fernando Villavicencio – i vrarë në gusht 2024 – e akuzoi shqiptarin se kishte lidhje me zyrtarë që lehtësonin operacionet e tij. E.A.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
