Një jaht luksoz me flamurin turk është gjetur i braktisur në det të hapur dhe me motorët e fikur për shkak të mbarimit të karburantit rreth 16 kilometra larg portit të Shëngjinit.
Dyshimet e para se në mjetin lundrues nuk kishte njeri i kanë hedhur një grup peshkatarësh të zonës që kishin dalë në det për të peshkuar me varkën e tyre.
Ata kanë njoftuar menjëherë policinë, e cila pasi ka konstatuar se brenda tij nuk kishte persona dhe ka nisur kontrollet për të gjetur ndonjë gjurmë që të çon tek pronari i jahtit. Policia ka gjetur dokumentacionin e rregullt dhe një pasaportë me emrin e Sevgin Yavuz, shtetas turk 53-vjeçar dhe biznesmen i njohur në vendin e tij.
Policia ka njoftuar menjëherë autoritetet e vendeve fqinjë dhe ato turke. Mësohet se pas marrjes së përgjigjeve dhe verifikimit të vulave në dokumentacionin e jahtit, Yavuz ka qëndruar për disa ditë në Mal të Zi, në portin e Tivarit, ndërsa në drejtim të Shqipërisë mendohet se është nisur nga Italia.
Autoritetet shqiptare kanë nisur hetimet për zhdukjen misterioze të 53-vjeçarit dhe dyshimet e para janë se ai mund të ketë rënë pre e një grabitjeje nga persona të panjohur në det të hapur, ose është mbytur aksidentalisht.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
