Nga Gazeta 'Si' - Shtetet e Bashkuara, së bashku me ndërmjetësit arabë, kërkuan të mërkurën(18 dhjetor) përfundimin e një marrëveshje midis Izraelit dhe Hamasit për të ndalur luftën 14-mujore në Rripin e Gazës.
Burime të Reuters në Kajro, thanë se një marrëveshje mund të nënshkruhet në ditët në vijim për një armëpushim dhe lirimin e pengjeve të mbajtura në Gaza në këmbim të të burgosurve palestinezë të mbajtur nga Izraeli.
Administrata amerikane, së bashku me ndërmjetës nga Egjipti dhe Katari, ka bërë përpjekje intensive ditët e fundit për të çuar përpara bisedimet përpara se presidenti Joe Biden të largohet nga detyra muajin e ardhshëm.
Të mërkurën, një zyrtar palestinez i afërt me negociatat, thekson Reuters, tha se ndërmjetësit kishin ngushtuar boshllëqet në shumicën e klauzolave të marrëveshjes, por ai tha se Izraeli kishte paraqitur kushte të cilat Hamasi i refuzoi.
Drejtori i CIA-s, William Burns, do të shkonte në Doha të mërkurën për bisedime me kryeministrin e Katarit, Sheikh Mohammed bin Abdulrahman Al Thani, për të kapërcyer boshllëqet e mbetura midis Izraelit dhe Hamasit, thanë burime të tjera me njohuri. CIA nuk pranoi të komentojë.
Njoftimi për armëpushimin vjen në momentin kur natën e së martës ushtria izraelite vrau 16 palestinezë. Mjekët thanë se një sulm ajror izraelit vrau të paktën 10 njerëz në një shtëpi në qytetin verior të Beit Lahiya, ku forcat e ushtrisë kanë vepruar që nga tetori, ndërsa gjashtë u vranë në sulme të veçanta ajrore në qytetin e Gazës, kampin Nuseirat në zonat qendrore dhe Rafah pranë kufi me Egjiptin.
Nga ana e saj, ushtria izraelite nuk pati asnjë koment.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
