.png)
Nga Gazeta ‘Si’- Rënia e regjimit të Bashar Al Assad-it ka shkaktuar një përgjigje ndëshkuese ushtarake nga Izraeli, i cili ka nisur sulme ajrore në objektiva ushtarake në të gjithë Sirinë dhe ka vendosur trupa tokësore brenda dhe përtej një zone tampon të çmilitarizuar për herë të parë në 50 vjet.
Ushtria izraelite tha të martën se kishte kryer rreth 480 sulme në të gjithë vendin gjatë dy ditëve të fundit, duke goditur shumicën e rezervave të armëve strategjike të Sirisë, ndërsa Ministri i Mbrojtjes Israel Katz tha se marina izraelite kishte shkatërruar flotën siriane gjatë natës, duke përshëndetur operacionin si “Një sukses i madh”.
Vetëm një ditë më parë, kryeministri izraelit Benjamin Netanyahu e kishte përshëndetur rënien e regjimit të Bashar al-Asad si “një kapitull të ri dhe dramatik”. Por një ditë më vonë, Netanyahu bëri të ditur se ka qenë ai që ka miratuar bombardimet për faktin se armët siriane mund të bien në duart e xhihadistëve.
“Ne nuk kemi ndërmend të ndërhyjmë në punët e brendshme të Sirisë; megjithatë, ne synojmë të bëjmë atë që është e nevojshme për sigurinë tonë. Si i tillë, unë miratova bombardimin e Forcave Ajrore ndaj aftësive strategjike ushtarake të lëna nga ushtria siriane në mënyrë që ato të mos bien në duart e xhihadistëve. Kjo është e ngjashme me atë që bëri Forcat Ajrore Britanike kur bombarduan flotën e regjimit të Francës “Vichy”, i cili bashkëpunonte me nazistët, në mënyrë që ai të mos binte në duart e nazistëve. Ne duam të kemi marrëdhënie me regjimin e ri në Siri, por nëse ky regjim lejon që Irani të rivendoset në Siri, ose lejon transferimin e armëve iraniane, ose armëve të çdo lloji, te Hezbollahu ne do të përgjigjemi me forcë dhe do të kemi një çmim të rëndë. Ajo që ndodhi me regjimin e mëparshëm do të ndodhë edhe me këtë”, tha Netanyahu.
Zyrtarët izraelitë kanë refuzuar të japin detaje se sa larg do të përparojnë forcat izraelite, apo sa kohë do të qëndrojnë atje. Danny Dannon, ambasadori i Izraelit në Kombet e Bashkuara, i tha Këshillit të Sigurimit në një letër të hënën se vendi i tij ishte “dislokuar përkohësisht në disa pika”.
Ai tha se ato ishin “masa të kufizuara dhe të përkohshme për të kundërshtuar çdo kërcënim të mëtejshëm ndaj qytetarëve të saj”. Ndërkohë Katari e konsideron të papranueshme që Izraeli të “shfrytëzojë” situatën aktuale në Siri dhe të shkelë sovranitetin e tij, tha zëdhënësi i ministrisë së jashtme në një konferencë për shtyp.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
