‘Inteligjenca Artificiale rrezikon të thellojë pabarazinë ekonomike’

Nga Gazeta ‘Si’- Rritja e inteligjencës artificiale rrezikon të shtojë pabarazinë, ka deklaruar drejtori ekzekutiv i BlackRock, Larry Fink.

Rritja e shpejtë e Inteligjencës Artificiale mund të çojë në thellimin e hendekut mes të pasurve dhe të varfërve, ka deklaruar Larry Fink, drejtori ekzekutiv i BlackRock. Kjo sepse sipas tij, vetëm një numër i vogël kompanish dhe investitorësh ka të ngjarë të përfitojnë nga fitimet financiare.

Në letrën e tij vjetore drejtuar investitorëve, Fink theksoi se përfitimet ekonomike nga zhvillimi i IA-së pritet të përqendrohen kryesisht te një numër i kufizuar kompanish dhe investitorësh, duke rrezikuar të përsërisin një model të njohur historik të shpërndarjes së pasurisë.

“Pasuria e madhe e krijuar gjatë disa brezave të fundit ka shkuar kryesisht te njerëzit që tashmë zotëronin asete financiare,” tha Fink, sipas The Guardian. “Dhe tani IA kërcënon ta përsërisë këtë model në një shkallë edhe më të madhe.”

CEO i BlackRock paralajmëroi se bum-i i IA-së mund të përshpejtojë një trend ku kompanitë kryesuese avancojnë më shumë, ndërsa të tjerat përpiqen të mbajnë ritmin.

Aksionet e teknologjisë të fokusuara në IA kanë shënuar rritje të konsiderueshme vitet e fundit. Një shembull i kësaj prirjeje është rritja e fortë e liderit të tregut, kompanisë së prodhimit të çipave, Nvidia, e cila ka arritur vlerësime rekord në treg. Tani ajo vlerësohet në 4.3 trilionë dollarë.

Fink tha se kompanitë që kanë të dhëna, infrastrukturë dhe financim për të përdorur IA në shkallë të gjerë “janë të pozicionuara për të përfituar në mënyrë disproporcionale”. Kjo mund të thellojë hendekun midis të pasurve dhe të varfërve, shtoi ai.

“Historia tregon se teknologjitë transformuese krijojnë vlerë të jashtëzakonshme dhe një pjesë e madhe e kësaj vlere u përket kompanive që i ndërtojnë dhe i përdorin ato, si dhe investitorëve që i zotërojnë”, tha Fink.

“Kjo nuk është e pazakontë dhe nuk është domosdoshmërisht problematike,” shtoi ai, duke theksuar se ndryshimet teknologjike shpesh kanë ndryshuar rrjedhat ekonomike.

Megjithatë, “pyetja më e shpeshtë është kush merr pjesë në këto fitime,” paralajmëroi Fink. “Kur kapitalizimi i tregut rritet, por pronësia mbetet e kufizuar, mirëqenia mund të duket gjithnjë e më e paarritshme për ata që janë jashtë.”

Komentet e Fink vijnë disa javë përpara se BlackRock të publikojë pagën e tij për vitin 2025. Një vit më parë ai mori 30.8 milionë dollarë, duke shkaktuar shqetësim te disa aksionarë, pasi vetëm 67% e tyre miratuan paketën e lartë të kompensimit pranverën e kaluar.

Paralajmërimet e tij vijnë në një kohë kur disa ekspertë flasin për rrezikun e një “flluske” në investimet në IA, duke e krahasuar situatën me periudhën para krizës së dotcom-it. Edhe Banka e Anglisë ka ngritur shqetësime për mundësinë e një korrigjimi të papritur në tregjet globale. Nga ana tjetër, Fink sugjeron se një pjesë e zgjidhjes është përfshirja më e gjerë e qytetarëve në tregjet financiare.

Ai argumenton se mbështetja vetëm te blerja e pronës si mënyrë për të ndërtuar pasuri është bërë më e vështirë, për shkak të kostove në rritje dhe kushteve më të ashpra të kreditimit.

“Nëse njerëzit ndihen se ekonomia nuk punon për ta, atëherë kjo është një sfidë për çdo vend,” theksoi ai.

Në përfundim, Fink nënvizoi se ndërsa IA do të krijojë vlera të mëdha ekonomike, sfida kryesore mbetet sigurimi që këto përfitime të ndahen më gjerësisht në shoqëri.