.png)
Qeveria thotë se deklarata e Fondit Monetar Ndërkombëtar mbi rreziqet që i kanosen ekonomisë shqiptare duhet lexuar me vëmendje, sepse ajo deklaratë, sipas ministres së Financave ndan mendimin se ekonomia është në përmirësim.
“Deklarata e FMN duhet të lexohet me vëmendje. Ndamë një mendim të përbashkët me FMN që ekonomia ka ardhur në përmirësim, ka treguar stabilitet në përballimin e dy krizave, tërmetit dhe pandemisë dhe i ka të gjitha potencialet për të përballuar krizën energjitike nëse do të përmbahet në përmasat që parashikohet në tregjet ndërkombëtare”, deklaroi ministrja e Financave, Delina Ibrahimaj.
Ibrahimaj e lexoi rritjen e çmimeve si shenjë garancie për rritjen e ekonomisë. Duke cituar Bankën e Shqipërisë, Ibrahimaj hodhi poshtë akuzat e PD se normat e interesit të borxhit do të rriten duke rënduar edhe më tej xhepat e shqiptarëve.
“Banka e Shqipërisë nuk pret që të rrisë normat e interesit. Inflacioni në shtator ishte 2.5 për qind. Banka e Shqipërisë vlerëson se inflacioni duhet 3 për qind për ta garantuar rritjen ekonomike, që parashikohet të arrihet vitin e ardhshëm”, tha ministrja.
Sipas ministres Ibrahimaj, nuk ka asnjë sinjal për varfërimin e xhepave të shqiptarëve
“Pagat janë rritur dhe do të vazhdojnë të rriten. Të ardhurat e disponueshme për familjet shqiptare kanë ardhur në rritje gjatë viteve të kaluara dhe do të vazhdojnë të rriten”, deklaroi ajo.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
