.png)
Gazeta Si - Përveç Hamza Licit dhe Arlind Bushatit, të cilët mbetën viktima në masakrën e Dobraçit një ditë më parë në Shkodër, në makinën me të cilën udhëtonin, dyshohet se ka qenë edhe një person i tretë. Sipas burimeve paraprake, mësohet se ai i ka shpëtuar breshërisë së plumbave nga autorët.
Viktimat udhëtonin me një automjet tip “Benz” me targa kroate në momentin që u sulmuan nga një mjet në lëvizje tip ‘Range Rover”.
Hetuesit kanë shtrirë dyshimet se një person i tretë ka qenë bashkë me dy viktimat, por që në momentin pas sulmit është larguar nga vendngjarja.
Kjo e dhënë e mbërritur në zyrat qendrorë të Policisë Shkodër ka kaluar në verifikim për të mësuar mbi identitetin e personazhit në fjalë.
Kjo e dhënë sipas burimeve shpjegohet me faktin se dikush mund t’i ketë ndihmuar duke i nxjerrë nga makina me targa kroate.
Pistat e hetimit dhe të shoqëruarit
Pistë kryesore për policinë mbetet hakmarrja dhe përplasja mes anëtarëve të familjes Lici me eksponentë të tjerë në Shkodër.
Mbi 50 gëzhoja janë gjetur në një distance prej rreth 150 metër. Dyshohet se kanë qenë 3 autorë, njeri drejtues i automjetit Range Rover dhe dy të tjerë të cilët kanë qëlluar.
Pavarësisht kësaj, shoqërimet që janë bërë në Drejtorinë Vendore të Policisë Shkodër nuk kanë qenë efektive për të mbledhur të dhëna të vlefshme për ngjarjen e rëndë.
Rreth 20 persona janë shoqëruar në Policinë e Shkodrës, mes tyre edhe Safet Bajri. Ky i fundit ka qëndruar rreth 2 orë në polici dhe mësohet se ka mohuar të ketë lidhje me atentatin.
Burimet thonë se Bajri ka deklaruar se gjatë kohës kur ka ndodhur atentati ka qenë në shtëpi me familjen.
Sipas tij, shtëpia është e monitoruar me kamera, që provon se ka qenë në banesë në momentin kur ka ndodhur atentati.
Viktimat
Viktimë e atentatit mbeti Hamza Lici, vëllai i vogël i Ibrahim Licit, i arrestuar dhe i liruar në Turqi, ku autoritetet atje refuzuan ekstradimin në Shqipëri.
Disa orë më vonë humbi jetën në spital dhe Arlind Bushati. Djali Xhemal Bushatit, ish-kandidati i PD për kryebashkiak të qytetit të Shkodrës, që po udhëtonte me Hamza Licin në makinën Benz C- Class me targa kroate.
Viktimë mbeti dhe Flutura Basha, një qytetare e pafajshme që po udhëtonte me bashkëshortin e saj me motor në momentin kur ndodhi atentati.
Ndërsa në spital në gjendje të rëndë është Bashkim Basha, bashkëshorti i Fatbadhës, që humbi jetën.
Sipas të njëjtave burime, i plagosuri rëndë nga kjo ngjarje, Bashkim Basha, po lufton me jetën në Spitalin Rajonal të Shkodrës. Ai ka qenë duke lëvizur me motor së bashku me bashkëshorten e tij kur është përplasur nga makina në të udhëtonin 2 viktimat, Hamza Lici dhe Arlind Bushati.
Në momentin që ata ranë pre e breshërive të plumbave, makina humbi kontrollin dhe përplasi 2 kalimtarët fatkeq.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
