Hap dyert panairi më i madh në botë i librit për fëmijë. Prezente edhe shtëpitë botuese shqiptare

Nga Gazeta “SI”– Panairi më i madh i librit për fëmijë në botë, “Bologna Children’s Book Fair” hapi dyert sot ku për katër ditë shtëpitë botuese nga e gjithë bota do të prezantojnë botime ekskluzivisht për fëmijë.

Fokusi i këtij viti janë shtëpitë e reja botuese dedikuar letërsisë për fëmijë gjithashtu dhe prezantimet e reja të botimeve.

“Bolonja pret një ngjarje unike në llojin e saj, e cila bashkon tre takime të rëndësishme për profesionistët e botimit: Bologna Children’s Book Fair (BCBF), panairi lider botëror për botimet për fëmijë; BolognaBookPlus (BBPlus), zgjerimi i dedikuar për botimin e përgjithshëm; dhe Bologna Licensing Trade Fair/Kids (BLTF/Kids), ngjarja e licencimit të markave dhe pronave për më të rinjtë.

Duke ndjekur traditën e përvitshme të vendit të ftuar nderi, këtë vit bëhet e ditur se i ftuari i nderit është shteti i Estonisë.

“Mysafiri i nderit për vitin 2025 do të jetë Estonia, e cila do të prezantojë një program të veçantë me ekspozita, takime dhe punëtori, si në panair ashtu edhe në qytet”

Mariana Ymeri: Këtë vit kemi qëllim të lobojmë për shkrimtarë shqiptarë të cilët mund të përkthehen në gjuhë të huaja.

Pjesëmarrëse e përvitshme në Panairin e Bolonjas, Mariana Ymeri, administratore e shtëpisë botuese “Dituria” thotë për Gazetasi.al se në këtë panair veç blerjeve të të drejtave të autorëve të huaj, do të kërkojnë të shesin edhe të drejtat e autorëve shqiptarë, vlerat e të cilëve sipas saj janë të padiskutueshme.

“Në Panairin e 62-të janë 1500 ekspozues nga 90 vende të ndryshme. Mysafir nderi është Estonia, që sapo organizoi një ceremoni të bukur përurimi. ‘Dituria’ dhe ‘Muza’ mbështeten nga programi i Ministrisë së Jashtme Italiane dhe zyra e Tiranës e ICE- Italian Trade Agency, që mbështet çdo vit aktivitete kulturore për librin, posaçerisht pjesemarrjen në panaire. ‘Dituria’ ka një program të pasur, takime të shumta me përfaqësues nga shtëpi botuese të huaja për të marrë (blerë) të drejtat e librave që shumë shpejt do të bëhen pasuri e lexuesit shqiptar, por këtë vit kemi synimin qe edhe ‘të shesim’ të drejta të autorëve tanë shqiptarë, për të rritur visibilitetin e këtyre autorëve, meqë jemi të bindur në vlerat e tyre”

Ymeri shton se këtë vit marrin pjesë disa shtëpi botuese shqiptare.

“Në panair ka disa shtëpi botuese shqiptare me stendë dhe libra të ekspozuar: Dituria, Ombra GvG, Muza etj. Sigurisht kontakti personal botues-botues është vendimtar për botime me vlerë edhe në të ardhmen. Panairi mbetet gjithmonë një mundësi e madhe për të pare trendet e letërsisë për fëmijë, për ilustrimet, takimet me autorë etj.”

Prej 61 vitesh, Bologna Children’s Book Fair (BCBF) është një ngjarje referuese për të gjithë ata që punojnë në fushën e botimit dhe përmbajtjeve të dedikuara për fëmijë dhe të rinj.

BCBF është pika kryesore e takimit për një audiencë të larmishme dhe ndërkombëtare, duke përfaqësuar eventin më të rëndësishëm në nivel global për shkëmbimin e të drejtave botuese, me një fokus të veçantë në licencimin dhe përmbajtjet multimediale për të rinjtë.

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.