Një i ri shqiptar në Greqi ka kaluar kufijtë e fantazisë, pasi hiqej si truprojë e kryeministrit Aleksis Tsipras.
Ai është vënë në pranga dhe para prokurorëve ka pranuar se kjo kishte qenë ëndrra e jetës së tij dhe në pamundësi për ta realizuar, e kishte sajuar.
Mediat greke shkruajnë se ai vepronte njëlloj si një truprojë, por doli blof, kur i tha një polici rrugor se ishte me shërbim pranë godinës së Kryeministrisë, pasi ishte roja personal i Tsipras dhe ishte aty me mision që t’i siguronte jetën kryeministrit grek.
Përballja e tij me policin ndodhi pasi shqiptari ndërhyri brutalisht në një debat mes rrugorit dhe një kalimtari, e madje e kërcënoi efektivin se do t’i vendoste prangat.
Ky i fundit kërkoi verifikim, por shqiptari u frikësua dhe u largua me vrap, duke lënë pas edhe një çantë shpine, që i ra në tentativë për të shmangur arrestimin.
Brenda çantës policia greke gjeti një mjet identifikimi dhe prej saj mbërriti deri te banesa e shqiptarit, ku gjatë kontrollit zbuloi dokumente identifikimi false, radiomarrëse, një armë dhe pranga.
I riu, 28 vjeç është arrestuar dhe tashmë duhet të përballet me disa akuza të ndryshme.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
