Gazeta Si - Dosja në ngarkim të ish-policit Arbër Sula, i cili vrau dhjetorin e shkuar në një market në kryeqytet Jurgen Dukën, është kthyer për të ndryshuar kualifikimin e veprës penale.
Vendimi është marrë nga Gjykata e Penale e Tiranës, e cila i është drejtuar Prokurorisë, duke kërkuar ashpërsim të akuzës ndaj të pandehurit.
Prokurori Petri Hysi erdhi në gjykatë me akuzën e "vrasjes në kushtet e tronditjes së rëndë psiqike", ndërsa në vlerësim të Gjykatës, akuza duhet të jetë "vrasje për cilësi të veçanta".
I pandehuri kishte kërkuar gjykim të shkurtuar, që nuk i është pranuar nga Gjykata, ndërsa pritet që Prokuroria të tërheqë dosjen dhe të vijë me një akuzë të re.
Arbër Sula vrau me armë zjarri në një market në orët e para të mëngjesit të 14 dhjetorit 2021 Jurgen Dukën.
Ish-agjenti i krimeve me detyrë në Dibër, qëlloi me armë zjarri për vdekje 29-vjeçarin në konfliktin e nisur për radhën e pagesës në një market në rrugën “Irfan Tomini” në Tiranë.
Fillimisht Duka mbeti i plagosur, ndërsa ndërroi jetë në spitalin e Traumës në Tiranë pasi plumbi e preku në zemër.
Arbër Sula ishte në arrati për më shumë se dy muaj dhe u vetëdorëzua në polici në 1 mars të këtij viti falë edhe presionit të familjarëve të tij.
Në ambientet e gjykatës gjatë dhënies së masës së sigurisë “arrest në burg”, Sula iu ka kërkuar ndjesë familjarëve të Jurgen Dukës
“Ju kërkoj ndjesë familjarëve, djemtë që u konfliktova më kërcënuan dhe në atë moment isha në gjende të rënduar psikologjike”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
