.png)
Gazeta Si - Gjykata e Lartë nuk ka pranuar rekursin e Fredi Belerit për t’u betuar si kryebashkiak i zgjedhur i Himarës, duke rrëzuar kërkesën e radhës.
Kjo ishte shkalla e fundit që Beleri mund t’i drejtohej një gjykate në Shqipëri, pasi më parë apelimi i tij për t’u betuar si kryebashkiak i është refuzuar nga Gjykata e Posaçme, Gjykata e Apelit në GJKKO dhe Gjykata Kushtetuese.
Beleri ndodhet në qeli që prej 12 majit të vitit të kaluar, kur u arrestua dy ditë para zgjedhjeve vendore për blerje votash.
Disa javë më parë, Beleri u dënua nga Shkalla e Parë e GJKKO me 2 vite burgim, vendim të cilin ai e ka apeluar.
Bashkëpunëtori i tij, Pandeli Kokaveshi u dënua me 1 vit e 6 muaj burg, por gjykata pezulloi dënimin me burg dhe e vuri në shërbim prove për 3 vitet e ardhshme.
Me ligjin shqiptar, parashikohet se një vepër penale si ajo e blerjes së votave për të cilën u dënua përfundimisht Beleri, sjell ndërprerejen e mandatit të tij të dhënë nga Komisioni Qëndror i Zgjedhjeve.
Përveç kësaj, atij nuk do t'i lejohet të kandidojë më në një proces të ardhshëm zgjedhor, edhe nëse ndërkohë do ta ketë mbaruar dënimin.
Arrestimi dhe mos lejimi i betimit të Fredi Belerit, si kryebashkiak i Himarës ka sjellë vendosjen e vetos nga Greqia, e cila nuk ka lejuar BE-në që të nisë negociatat me Shqipërinë për shqyrtimin e kapitujve të parë të anëtaresimit.
Kryeministri Mitsotakis dhe ministri i Jashtëm grek, Jorgos Jerapetritis, kanë akuzuar qeverinë shqiptare se nuk ka respektuar parimin e prezumimit të pafajsisë për Belerin, duke mos lejuar betimin e tij, ndërsa e kanë konsideruar atë si çështje evropiane dhe jo dypalëshe.
Nga ana tjetër, Beleri është kandiduar zyrtarisht për eurodeputet në garën për zgjedhjet evropiane të 9 qershorit në Greqi nga partia e djathtë në pushtet “Demokracia e Re” e kryeministrit grek Kyriakos Mitsotakis.
Emri i Fredi Belerit u shpall ndër të fundit në listën prej 42 kandidatëve të kësaj partie në aktivitetin e hapjes së fushatës elektorale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
