.png)
Gazeta Si – Thuajse dy javë pas vdekjes së Papa Franceskut, kardinalët katolikë romanë janë mbledhur pasditen e kësaj të mërkure, 7 maj 2025, me misionin për të zgjedhur pasuesin e tij.
Ata do të izolohen nga bota deri sa zgjedhin njeriun, qe shpresojnë se do të bashkojë Kishën e përçarë globale.
Në një proces që daton që prej kohërave të mesjetës, kardinalët do të mbyllen në kapelën Sistine të Vatikanit nën afresket e Mikelanxhelos, dhe duke shkëputur kontaktet me boten jashtë do të nisin Konklavën e fshehtë për Papën e ri.
Por asnjë Papë nuk është zgjedhur në ditën e parë të konklavës për shekuj, kështu votimi mund të vazhdojë për disa ditë, deri sa një prej princave me kapele të kuqe të Kishës të sigurojë 2/3 e votave për t’u bërë Papa i 267.
Por kush janë kandidatët favoritë me fillimin e Konklavës, që pritet të zgjedhë Papën e ri pas vdekjes së Françeskut.
Bilancet dhe marrëveshjet (të mundshme) pas “Extra omnes”. Profilet e Parolin, Zuppi, Aveline, Prevost, Grech dhe Filoni.
Pietro Parolin
I lindur në Schiavon, në zonën e Viçencës, ai është 70 vjeç dhe është Sekretar Shteti në Vatikan.
Ishte ai që punoi për marrëveshjen historike të nënshkruar në vitin 2018 me Kinën që u lejon peshkopëve kinezë të jenë në bashkësi të plotë me Papën.
Për të, “Azia është e ardhmja e Kishës”. Ditët e fundit ai ka qenë në qendër të insinuatave për shëndetin e tij, por lajmi për një sëmundje është mohuar kategorikisht nga Selia e Shenjtë.
Pierbattista Pizzaballa
Ai i përket urdhrit françeskan dhe aktualisht është Patriarku Latin i Jeruzalemit, detyrë që e mban që nga viti 2020.
Ka lindur në Castel Liteggio (Bergamo) dhe është 60 vjeç. Studiues biblik, i konsideruar i urtë dhe rigoroz në punën e tij, por edhe ironik dhe me një udhëheqje të natyrshme të orientuar drejt kontaktit mes kulturave dhe feve të ndryshme. Karakteristikat e vendosin atë në mesin e kandidatëve të preferuar.
Luis Antonio Tagle
Filipinas nga Manila, 67 vjeç, nënë me origjinë kineze, ai është i dashur për karizmën e tij baritore dhe njohjen e botës aziatike.
Tagle mishëron konceptet e dashura të Papa Françeskut, të një Kishe si “urë” midis kulturave të ndryshme dhe afër të varfërve.
Një video e vjetër e tij duke kënduar “Imagine” u bë virale, duke tërhequr kritika pasi kënga konsiderohej kundër parimeve të krishtera.
Matteo Maria Zuppi
I lindur në Romë, ai është 69 vjeç dhe është president i CEI-t. Si i ri, ai iu afrua Komunitetit të Sant’Egidio, deri në atë pikë sa u bë udhërrëfyes i saj shpirtëror.
Françesku e emëroi atë kryepeshkop të Bolonjës në vitin 2015. Ai është në përputhje me pontifikatin e Françeskut për çështjet që lidhen me varfërinë dhe emigrantët: kjo e vendos atë në mesin e të preferuarve të kampit “progresiv”.
Robert Francis Prevost
Kardinali 69-vjeçar i lindur në Çikago është një figurë e shquar në Episkopatën Amerikane.
Anëtar i Urdhrit Augustinian, ai drejton Dikasterin e Peshkopëve dhe është president i Komisionit Papnor për Amerikën Latine.
Ai ka një profil të aftë për të ndërmjetësuar mes shpirtrave të ndryshëm të Amerikës Katolike me vëmendje ndaj çështjeve sociale dhe kulturore.
Jean-Marc Aveline
I lindur në Algjeri, ai është 67 vjeç, u rrit në Marsejë, ku u bë kryepeshkop metropolitan në vitin 2019 dhe në vitin 2022 u bë kardinal nga Françesku.
Një mbështetës i fortë i dialogut midis feve dhe i vëmendshëm ndaj çështjeve të emigracionit, ai ka një vizion baritor në frymën e Françeskut, rruga e të cilit për vëmendjen ndaj periferive mund të vazhdojë.
Mario Grech
Kardinali maltez 68-vjeçar ishte shumë i afërt me Papa Françeskun dhe është peshkop Emeritus i Gozos.
Pas shugurimit të tij si meshtar, studioi në Romë. Fillimisht, i lidhur me Ratzinger-in për çështjen e homoseksualitetit, me kalimin e viteve ai u tërhoq nga pozicionet e tij, duke demonstruar një kapacitet të madh për ndryshim për çështje të ndjeshme.
Fernando Filoni
I njohur si “Papa i Kuq”, ai është ekspert i diplomacisë kishtare. I lindur 79 vjet më parë në Manduria (Puglia), ai u bë nunci dhe prefekt i Kongregatës për Ungjillizimin e Popujve në vitin 2011.
Detyrat e tij në zonat e krizës, si Iraku (ku mbeti gjatë bombardimeve) dëshmojnë përkushtimin e tij ndaj vlerave të paqes dhe dialogut.
Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
