Nga Ferri, në Parajsë! Një histori e bukur duket të jetë ajo e Ardian Fullanit, ish-Guvernatorit të Bankës së Shqipërisë, i cili u arrestua pak vite më parë për zhdukjen e 713 milionë lekëve.
Duket se arrestimi nuk ka ndikuar aspak në karrierën e Fullanit, pasi ai nga sot do të jetë 1 nga 11 anëtarët e bordit këshillues të Bankës Qendrore në Mal të Zi.
Janë mediat e vendit fqinj që raportojnë lajmin e bujshëm, duke sqaruar se përzgjedhja e Fullanit si anëtar është bërë nga Bordi Drejtues i Bankës Qendrore të Malit të Zi në shtator të vitit të kaluar kur u miratua krijimi i Bordit Këshillues.
Ndërkohë në raportimin e tyre, mediat malazeze e vendosin theksin te fakti se mbi Fullanin është hedhur një lum akuzash gjatë kohës që u zbulua vjedhja e parave në Bankën e Shqipërisë.
I pyetur nga mediat nëse emërimi i Fullanit në këtë post do të ndikojë në besueshmërinë e Bankës Qëndrore, Guvernatori i Malit të Zi nuk e komentoi rastin në fjalë, ndërsa e përditshmja “Vejesti” shkruan: “Guvernatori i Bankës Qendrore të Malit të Zi Radoje Zhugiç ka vendosur si anëtar të Bordit Këshillues të Bankës, ish guvernatorin e Bankës së Shqipërisë Ardian Fullanin, i cili në shtetin e tij është shkarkuar dhe arrestuar sepse nga kasaforta e Bankës së Shqipërisë janë zhdukur 713 milionë lekë”.
Organet e drejtësisë shqiptare kërkuan 5 vite burg për të, por pas disa seancave gjyqësore, Fullani mori pafajësinë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
