.png)
Gazeta Si – Gjykata e Posaçme do të pyesë më shumë se 67 dëshmitarë në procesin kundër Ardian Hajdarit, anëtarit të Kolegji të Posaçëm të Apelimit, të akuzuar për fshehje të pasurisë.
Plot 67 prej tyre u kërkuan nga vetë Hajdari, për të provuar se kanë marrë shërbime avokatie pa pagesë prej tij.
Më herët, pyetja e tyre u kundërshtua nga prokurorja e SPAK, e cila pretendoi se Hajdari duhet t’i kishte deklaruar në organet tatimore shërbimin ndaj tyre. Në seancën e radhës do të vijohet me pyetjen e 5 dëshmitarëve të parë të prokurorisë.
Në shkurt të këtij viti, Kolegji i Posaçëm i Apelimit pezulloi Hajdarin nga detyra. SPAK nisi hetimet ndaj tij pas një kallëzimi të dy ish-prokurorëve Antoneta Sevdari e Elsion Sadiku dhe një ish-gjyqtarit, Ervin Metalla, të tre të shkarkuar nga procesi i Vettingut.
Ata pretenduan se Hajdari kishte falsifikuar një nga dokumentet me të cilat kishte aplikuar për të qenë pjesë e KPA-së, si edhe nuk kishte deklaruar në ILDKP disa prej të ardhurave të fituara nga avokatia.
Ardian Hajdari akuzohet për “deklarim të rremë të pasurisë” dhe “fshehje e të ardhurave”. Hajdari kishte kërkuar përjashtimin e kryesueses së seancës, Atalanta Zeqiraj, me pretednimin se kishte konstatuar faktin se gjyqtarja kishte miqësi me kallëzuesen e tij, ish-prokuroren Antoneta Sevdari.
Më herët, 2 shkallë të gjyqësorit gjetën fajtor Luan Dacin për falsifikim dokumentesh, teksa beteja e tij vijon ende në Gjykatën e Lartë, ku kërkon pafajësi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
