.png)
Fredi Beleri ka fituar lirinë me kusht. Gjykata e Fierit e pranoi kërkesën e avokatit, pas tri seancash të dështuara, ku Beleri kërkonte lirimin me kusht.
Pas dy orësh qëndrimi në Gjykatën e Fierit, trupi gjykues ka vendosur për lirimin me kusht të Fredi Belerit, i cili ka edhe gjashtë javë deri në përfundimin e dënimit.
“E pranoi kërkesën gjykata, urdhëroi lirimin para kohe, i mbeteshin edhe 6 javë, respekte për gjykatën, lirimi para kohe me kusht, dy muaj i kishin mbetur. Pronari që i ka çelësat e burgut dha leje pas zgjedhjeve që të dali”, tha avokati i Belerit, Geni Gjyzari.
Beleri u dërgua në burgun e sigurisë së lartë në Fier për përfundimin e procedurave të nevojshme dhe u lirua rreth orës 13.30.
Para mediave Beleri është shprehur se do të luftojë për çështjen e tij në Strasburg, dhe nëse fiton do të kandidojë sërish për kryebashkiak të Himarës.
“Në 14 maj unë isha fitues, dhe në 4 gusht zgjedhjet janë të paligjshme nga të gjitha aspektet, i pa ligjshëm është shkarkimi im, i paligjshëm dhe ai vendim i presidentit dhe kryeministrit që implikoi gjithë qeverinë dhe mafien për të gatuar një palë zgjedhje në një fshat.
Liria e çdo njeriu është e shenjtë dhe do e luftoj këtë liri në ambientet jashtë burgut.
Si eurodeputet i cili jam zgjedhur nga demokracia e re dhe nga qytetarët grekë dhe me mundësinë që kam do të ngre zërin”, tha ai.
Fredi Beleri u dënua me vendim të formës së prerë me 2 vite burg për korrupsion në zgjedhjet e 14 majit të shkuar. Ai u zgjodh pas arrestimit, Kryebashkiak i Himarës, por mandatin e humbi pas vendimit të Apelit.
E teksa vuante dënimin në burg, ai u zgjodh eurodeputet i Greqisë nga partia e kryeministrit Mitsotakis.
Beleri u betua në Korrik si eurodeputet, pasi iu dha lejë nga Drejtoria e Burgjeve.
Ndërkaq në Himarë u mbajtën zgjedhjet e reja në 4 gusht dhe ato i fitoi kandidati i PS Vangjel Tavo, i cili nuk ka nisur ende detyrën, pasi opozita po ndjek shkallët që konteston zgjedhjet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
