.png)
Gazeta Si - Të paktën një mijë traktorë kanë bllokuar disa rrugë në Bruksel, veçanërisht pranë Lagjen Evropiane, ku priten liderët e BE-së për Këshillin e jashtëzakonshëm Evropian.
Fermerët, të cilët mbërritën nga e gjithë Evropa për të protestuar kundër Politikës së Përbashkët Bujqësore (CAP) dhe Marrëveshjes së Gjelbër, bllokuan “Place de Luxembourg” përpara Parlamentit Evropian dhe ndezën disa zjarre me dru dhe goma. Policia njoftoi se pati shumë shpërthime fishekzjarrë.
Sot në Këshillin Evropian "ne po diskutojmë gjithashtu buxhetin" dhe "objektivi i parë është që të sigurohemi që bujqësisë të mos i hiqen më burime siç ka ndodhur në dekadat e fundit. Ky tashmë mund të jetë një sinjal i mëtejshëm për sipërmarrësit tanë", tha presidenti i Coldiretti-t, Ettore Prandini, duke folur në shesh para Parlamentit Europian, ku po zhvillohet maksi-mobilizimi i traktorëve nga e gjithë Evropa.
“Pika e parë është heqja e të gjitha kufizimeve që nga Timmermans këndej janë përpjekur të fusin me rregulla që penalizojnë kapacitetin prodhues të BE-së”, nënvizoi ai.
Disa organizata fermerësh dhe delegacione nga organizatat bujqësore spanjolle, portugeze dhe italiane do t’i bashkohen samitit të liderëve të BE-së.
Autoritetet franceze kanë paralajmëruar se ndërsa protestat e fermerëve u është dhënë leje për t’u mbajtur në autostrada, policia nuk do t’i lejojë fermerët të bllokojnë aeroportet ose tregun Rungis, ku dyqanet, supermarketet dhe restorantet nga Franca dhe më gjerë blejnë ushqime.
Protesta të ngjashme u mbajtën edhe në autostradat në Greqinë Qendrore ku fermerët grekë u rreshtuan me traktorët e tyre. Fermerët thonë se po përballen me rritje të kostove të prodhimit, ndërsa çmimet mbeten të ulëta.
Fermerët në të gjithë bllokun thonë se nuk paguhen sa duhet, paguajnë taksa të larta dhe përballen me konkurrencë të pandershme nga jashtë.
Jo vetëm kaq, por ata kërkojnë gjithashtu çmime më të drejta për prodhimet, vazhdimin e subvencioneve për naftën bujqësore, si dhe anulimin e marrëveshjes mes BE-së dhe vendeve të Amerikës së Jugut, pasi kjo synon të sjellë prodhime më të lira veçanërisht të mishit të viçit, që nuk përmbushin standardet.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
