.png)
Lufta në Ukrainë arriti në ditën e 956 dhe zyrtarët e Kievit, së bashku edhe me aleatët perëndimorë, me sa duket po vlerësojnë një kompromis të mundshëm që përfshin “anëtarësimin e Ukrainës në NATO në këmbim të disa territoreve të pushtuara nga Rusia”.
Lajmin e ka bërë të ditur “Financial Times”.
Deri tani gjithçka është në kuadrin e diskutimeve, por situata është komplikuar së fundmi sepse nuk ka konsensus në Këshillin e Bashkimit Europian për një zgjatje kohore të sanksioneve, apo një bllokim tjetër ndaj aseteve që Banka Qendrore Ruse zotëron në Europë.
"Diplomatët perëndimorë dhe zyrtarët ukrainas po bashkohen në mendimin se një garanci domethënëse për sigurinë mund të çojë drejtë një negociate për zgjidhje, ku rusët do të mbajnë de facto, por jo de jure, kontrollin e të gjithë ose një pjese të territorit ukrainas që pushton aktualisht", shkruan FT.
Për të qenë të qartë, as Kievi dhe as mbështetësit e tij nuk po propozojnë njohjen e sovranitetit të Rusisë mbi një të pestën e territorit ukrainas që ka rrëmbyer ilegalisht që nga viti 2014. Një gjë e tillë do të inkurajonte agresionin e mëtejshëm rus dhe do të minonte rëndë rendin juridik ndërkombëtar.
Ajo që parashikohet është pranimi i heshtur që ato toka të rifitohen me rrugë diplomatike në të ardhmen. Edhe kjo, kuptohet, është një çështje e ndjeshme për ukrainasit, veçanërisht kur paraqitet si bazë e një kompromisi me Moskën.
Dhënia e tokës për të fituar anëtarësimin në NATO mund të jetë "loja e vetme në qytet", por për ukrainasit kjo mbetet një tabu, të paktën në publik.
Kjo marrëveshje konsiderohet thelbësore për t’i dhënë garanci SHBA-ve që të marrin pjesë me 20 miliardë dollarë në huanë që G7 ka vendosur të marrë për të ndihmuar Ukrainën. Ndër vendet më të zëshme që kundërshtojnë huanë është Hungaria.
Gjatë vizitës së tij në Kiev, Sekretari i Përgjithshëm i NATO-s Mark Rutte bëri të ditur se ishte pro hyrjes së Ukrainës në Aleancën e Atlantikut, por Volodymyr Zelensky iu përgjigj se Nato duhet të dërgojë sa më shpejt armët me rreze të gjatë veprimi: “Pa mjete të caktuara dhe mundësinë e përdorimit të këtyre armëve, ne nuk mund ta ndalojmë Rusinë”, deklaroi Zelensky.
Ekspertët thonë se në kushtet aktuale është e vështirë që Ukraina t’i bëjë ballë luftës, ndaj edhe është rikthehet ideja e këmbimit të territoreve. Ata vënë në dukje se konflikti Rusi-Ukrainë ka nisur që para 10 vitesh, me agresionin e Moskës në rajonin e Donbasit. Që prej vitit 2014 Rusia në forma të ndryshme i ka marrë vazhdimisht territore Ukrainës, ndërsa kjo e fundit ka surprizuar vetëm me një betejë: atë në rajonin e Kurskut, por është shumë pak në raport me çfarë ka humbur në një dekadë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
