.png)
Nga Gazeta Si - Do të jetë “Jeanne du Barry’, filmi i ri me Johnny Depp, në të cilën aktori luan mbretin Louis XV, do të hapë edicionin e 76 të Festivalit të Filmit në Kanë (16-27 maj). Këtë e kanë bërë të ditur organizatorët.
Me regji të Maiwenn, e cila luan gjithashtu rolin e kurtizanes së famshme të shekullit të 18-të që gjen rrugën e saj në dashuritë e Mbretit, filmi do të ketë premierën botërore të martën më 16 maj në Grand Théâtre Lumière dhe do të shfaqet në kinematë franceze në të njëjtën ditë. Ky është roli i parë i madh për Depp pas gjyqit për shpifje kundër ish-bashkëshortes Amber Heard.
Gjithashtu luan Benjamin Lavernhe, Melvil Poupad, Pierre Richard, Pascal Greggory dhe India Hair, dhe shënon rolin e parë të Depp në një film artistik që nga performanca e tij e fundit në “Minamata” në 2020, i cili u prezantua në edicionin e 70-të të Festivalit të Filmit në Berlin, dhe ku aktori luante fotografin amerikan të dokumentarit William Eugene Smith.
Që atëherë, në fakt, Depp është përballur me probleme të panumërta ligjore: së pari ai humbi një çështje shpifjeje kundër tabloidit britanik “The Sun”, i akuzuar se e quajti atë një “dhunues grash”, më pas ai fitoi një tjetër çështje shpifjeje kundër ish-gruas Amber Heard, e cila e kishte akuzuar për dhunë në familje.
“Jeanne du Barry” kronizon ngritjen dhe rënien e kurtizanes së shekullit të 18-të, Madame du Barry (e luajtur nga Le Besco), e preferuara e mbretit Louis XV (luajtur nga Depp), i cili është në qendër të skandalit dhe luksit. Protagonistja, një grua me origjinë modeste, e uritur për kulturë dhe kënaqësi që përdor inteligjencën dhe sharmin e saj për të bërë një ngjitje në shoqëri, pushton zemrën e mbretit dhe dhomat e Versajës, duke ngjallur indinjatën e të gjithë oborrit.
Filmi u financua nga “Red Sea Film Foundation” të Arabisë Saudite. Fondacioni, i lindur në vitin 2019, ka financuar tashmë rreth 170 tituj afrikanë dhe arabë, por “Jeanne du Barry” është depërtimi i tij i parë në kinemanë europiane.
Këtë vit Kana tashmë ka disa produksione të shkëlqyera të Hollivudit, si “Indiana Jones and the Dial of Destiny”, premiera botërore së bashku me më të fundit të Martin Scorsese, “Killers of the Flower Moon”, me Leonardo DiCaprio dhe Robert De Niro.
Formacioni i plotë do të shpallet më 13 prill. /La Stampa/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
