Studiues në Barcelonë, Spanjë, kryen një studim me 2000 fëmijë për të kuptuar nëse nivelet e larta të ndotjes së ajrit, zhurmës dhe trafikut ndikojnë në peshën e fëmijëve.
Fëmijët e moshës 9 deri në 12 vjeç u ekzaminuan nga ekspertë të Institutit të Barcelonës për Shëndetin Global dhe Institutit Universitar për Kërkime të Kujdesit Parësor.
40% e fëmijëve që jetonin në qytet ishin mbipeshë në kohën e studimit, dhe faktorët urbanë duke përfshirë ndotjen, zhurmën dhe trafikun ishin fajtorët.
Autorët thonë se duke kuptuar mekanizmin e marrëdhënies midis një mjedisi urban dhe mbipeshës së fëmijëve mund të çojë në një reagim nga organet kompetente.
Ata nuk mund të thoshin se çfarë e shkaktoi lidhjen, por sugjerojnë që mund të jetë ndotja e ajrit që shkakton inflamacion ose stres oksidativ, përçarje të hormoneve dhe shtim të dhjamit të organeve të brendshme.
Studiuesit e nisën studimin në tetor 2017 dhe janar 2019.
Ata vështruan masa të ndryshme të mbipeshës në fëmijëri duke përfshirë indeksin e masës trupore, perimetrin e belit dhe dhjamin e trupit.
Ekipi më pas vështroi sjelljet e lidhura me peshën të tilla si ngrënia e ushqimit të shpejtë dhe konsumimi i pijeve të ëmbëlsuara, aktiviteti fizik, qëndrimi ulur, kohëzgjatja e gjumit dhe mirëqenia e përgjithshme.
Deri më sot, pak studime kanë vlerësuar nëse mjedisi urban ndikon në sjelljet e fëmijëve në mënyrë që të kuptohet më mirë marrëdhënia midis këtij ambienti dhe rrezikut të mbipeshës së fëmijëve.
“Nivele më të larta të ndotjes së ajrit, trafikut dhe zhurmës u shoqëruan me indeks më të lartë të masës trupore dhe një gjasë më të lartë që fëmija të jetë mbipeshë ose obez”, shpjegoi autori kryesor Jeroen de Bont.
Megjithëse mekanizmat që mund të shpjegojnë këtë mbeten të panjohura, ekipi shkencor propozoi ide të ndryshme që mund të jenë arsye.
Për shembull, ata thonë se ndotja e ajrit mund të prishë mekanizmat molekularë që shkaktojnë mbipeshë duke shkaktuar inflamacion ose stres oksidativ dhe dhjamosje të organeve të brendshme.
Zhurma mund të ndikojë në gjumin e keq dhe të rrisë hormonet e stresit, të cilat lidhen me zhvillimin fizik në fëmijëri dhe mund të rrisin rrezikun e mbipeshës.
Një arsye tjetër mund të jenë dhe gjithë fast-food-et, një mjedis që mund të favorizojë konsum më të lartë të ushqimit të shpejtë dhe marrje më të lartë të kalorive.
Studimi, megjithatë, nuk gjeti një lidhje midis mjedisit urban dhe nivelit të aktivitetit fizik, qëndrimit ulur dhe sjelljeve të tjera të lidhura me peshën tek fëmijët, megjithëse mendohet se faktorë të tillë mund të luajnë një rol.
Për shembull, në zonat me një rrjet të mirë të transportit publik dhe pajisje dhe dyqane aty pranë, udhëtimet priren të bëhen në këmbë ose me biçikletë, gjë që rrit aktivitetin fizik të fëmijëve.
Fakti që studimi nuk gjeti një lidhje midis këtyre faktorëve mund t’i atribuohej ‘vështirësisë për të përcaktuar se në çfarë mase vetë mbipesha ndikon në sjelljet e lidhura me peshën’, shpjegoi de Bont.
“Statusi socio-ekonomik luan një rol të rëndësishëm midis mjedisit urban dhe mbipeshës në fëmijë që nuk është ende e qartë’, komentoi Martine Vrijheid, një studiues në ISGlobal.
Në këtë studim, fëmijët që jetonin në periferi të qytetit kishin nivele më të larta të mbipeshës dhe obezitetit edhe pse ishin të ekspozuar ndaj niveleve më të ulta të ndotjes së ajrit, trafikut rrugor dhe zhurmës.
Ata fëmijë gjithashtu kishin qasje në më shumë hapësira të gjelbërta, gjë që i shtyu autorët të thonë se duhen hulumtime të mëtejshme për të hedhur dritë mbi këtë çështje.
Gjetjet janë botuar në revistën Environment International.
Burimi: Daily Mail. Përshtati: Gazeta “Si”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
