.png)
Gazeta Si – Pa kaluar as 24 orë nga ekzekutimi me armë zjarri i Martin Bardhit në Rrëshen, një tjetër ngjarje kriminale u shënua pas mesnatës së kësaj të mërkurë në Duurës.
Policia thotë se Fatjon Dervishi, 38 vjeç, nipi i një personazhi të njohur në zonën e Sukthit u qëllua me breshëri arme nga persona të panjohur.
Ai ndërroi jetë në spital si pasojë e plagëve në trup. Mësohet se viktima është zënë në pritë tek shinat e trenit në Sukth dhe është qëlluar me breshëri plumbash me automatik.
Dy plumba e kanë përshkuar në trup duke i dëmtuar organet jetësore, edhe pritet ekspertiza mjeko-ligjore.
Në momentin kur e kanë qëlluar, 38-vjeçari ishte në automjet së bashku me një shokun e tij dhe po drejtonte makinën.
Personi tjetër nuk është prekur nga plumbat. Sipas dëshmisë së këtij të fundit, rezulton se ata kishin qenë në një lokal dhe po ktheheshin për në shtëpi kur janë goditur.
“Ishim në një lokal dhe po ktheheshim në shtëpi kur na qëlluan”, ka deklaruar në polici shoku i viktimës.
Mësohet 38-vjeçari është nipi i “Arapit të Sukthit”, një personazh i njohur për drejtësinë në zonën e Sukthit.
Ai është person me precedent kriminal në trafikun e lëndëve narkotike dhe i skeduar për vrasje. “Arapi i Sukthit” në vitin 1991 është akuzuar për vrasjen e A.Çyrbja.
Sa i takon ngjarjes, policia ka nisur hetimet për zbardhjen dhe ka pyetur 10 persona që dyshohet se mund të kenë dijeni.
Fatjon Dervishi është banor i zonës Katund Sukth, ndërsa mësohet se ka jetuar edhe jashtë vendit.
Grupi hetimor ka shkuar në vendngjarje dhe në bashkëpunim me Prokurorin vijon veprimet për zbardhjen dhe dokumentimin e rrethanave të ngjarjes, me qëllim identifikimin dhe kapjen e autorit/ve.
Në ndihmë të Policisë vendore janë nisur dy grupe të FNSH-së-së Tiranë. Ndërkohë shërbimet e Policisë kanë ngritur pika kontrolli dhe vijon krehja e zonës.
Kjo është vrasja e dytë brenda 24 orësh, kur të martën në mesditë u vra nga breshëria e kallashnikovit Martin Bardhi dhe u plagosën 3 persona të tjerë që ndodheshin me të në një lokal. Dyshimet e para të policisë për këtë ngjarje janë për hakmarrje mes dy fiseve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
