Edhe Shqipëria mes ekipit ndërkombëtar të IAEA-s në centralin bërthamor të Zaporizhias

Gazeta Si –Në mes të ekipit mbikëqyrës ndërkombëtar bërthamor të OKB-së në centralin bërthamor të Zaporizhias në Ukrainë, do të jetë edhe Shqipëria.

Lajmi bëhet i ditur nga mediat e huaja, të cilat raportojnë se në misionin e Agjencisë Ndërkombëtare për Energjinë Atomike, do të marrin pjesë 13 ekspertë nga vende të ndryshme të botës.

Misioni i IAEA-s, përfshin ekspertë nga Polonia dhe Lituania, vende të konsideruara si miqësore nga Ukraina, por edhe të tjerë nga Serbia dhe Kina, të cilat Ukraina i sheh me dyshim të thellë për shkak të marrëdhënieve të tyre komode me Moskën.

Anëtarët e mbetur, janë nga vende që kryesisht kanë qëndruar në periferi të luftës ose që kanë mbajtur kanale të hapura me Kremlinin.

“Ato përfshijnë Shqipërinë, Francën, Italinë, Jordaninë, Meksikën dhe Maqedoninë e Veriut”, – shkruan gazeta amerikane “New York Times”.

Ekipi do të kryesohet nga drejtori i IAEA-së, Rafael Mariano Grossi, nga Argjentina.

The day has come, @IAEAorg‘s Support and Assistance Mission to #Zaporizhzhya (ISAMZ) is now on its way. We must protect the safety and security of #Ukraine’s and Europe’s biggest nuclear facility. Proud to lead this mission which will be in #ZNPP later this week. pic.twitter.com/tyVY7l4SrM

— Rafael MarianoGrossi (@rafaelmgrossi) August 29, 2022

Një diplomat i lartë i njohur me negociatat, tha se Rusia i kishte dhënë miratimin e saj ekipit të inspektimit dhe tregoi se kishte pranuar kërkesën e Ukrainës që misioni të kishte origjinën në territorin që ajo kontrollon.

Frika nga një katastrofë e mundshme bërthamore ka nxitur reagimin e ndërkombëtarëve.

Ukraina akuzon forcat ruse se me sulmet e saj po rrezikon centralin bërthamor të Zaporizhias. Nga ana tjetër, Moska i mohon këto pretendime.

“Duhet të mbrojmë sigurinë e objektit më të madh bërthamor të Europës dhe Ukrainës”, tha drejtori i përgjithshëm i Agjencisë Ndërkombëtare të Energjisë Atomike.

Ekipi mbikëqyrës i OKB do të verifikojë nëse ka dëmtime nga luftime në centralin bërthamor dhe do të vlerësojë kushtet në të cilat punon stafi ukrainas.

Ekspertët e Kombeve të Bashkuara pritet të bëjnë vlerësimin e dëmeve në central, të përcaktojnë funksionalitetin e sistemeve të sigurisë, të vlerësojnë kushtet e stafit dhe të kryejnë aktivitete urgjente të sigurisë, tha agjencia.

As Grossi dhe as agjencia që ai udhëheq nuk kanë treguar se kur do të arrijë ekipi i ekspertëve në Zaporizhja.

OKB dhe Ukraina kanë bërë thirrje për tërheqjen nga centrali i Zaporizhias të pajisjeve ushtarake.

Ndërkaq, G7 ka mirëpritur udhëtimin drejt Zaporizhias dhe përsëriti shqetësimet lidhur me siguri në central.

“Ne riafirmojnë se centrali i Zaporizhias dhe elektriciteti që prodhohet aty i takojnë Ukrainës dhe theksojmë se përpjekjet e Rusisë që të shkëpusë centralin nga rrjeti elektrik ukrainas janë të papranueshme”, u tha në deklaratën e Grupit të Shtatë vendeve më të industrializuara.

Javën e kaluar, autoritetet nisën të shpërndanin ilaçe jodi për banorët që jetojnë afër centralit të Zaporizhias, që do të duhej t’i përdornin në rast të ekspozimit ndaj rrezatimit.