Qeveria zgjeroi perimetrin e gjendjes së jashtëzakonshme duke përfshirë edhe zonën e Laçit dhe të Mamurrasit, dy zona të goditura fort nga tërmeti, por që fatmirësisht nuk patën bilancet tragjike në jetë njerëzore si Durrësi dhe Thumana.
Vendimi u mor në mbledhjen e Qeverisë mëngjesin e kësaj të premteje.
“Ka dëme edhe në Laç, kanë dalë nga godinat dhe janë nëpër çadra. Duke konsideruar edhe opinionin e kryetarit të opozitës them që na përputhen shqetësimet edhe idetë. Përfshijmë edhe zonën e prekur të Laçit në të njëjtin program që askush të mos ndihet i vendosur në një kategori të dytë të vëmendjes”, deklaroi Kryeministri.
Mbrëmjen e së enjtes, vendosjen e Laçit dhe të Mamurrasit në gjendje të jashtëzakonshme e kërkoi edhe kreu i PD-së, Lulzim Basha. Ai tha se janë qindra banesa të dëmtuara rëndë nga tërmeti trë cilat janë të pabanueshme.
“Mijëra banorë janë në gjendje emergjence të plotë, qindra në çadra, ndërkohë që shiu ka nisur papushim. Dëmtime ka pësuar edhe spitali i Laçit dhe gjimnazi. Njerëzit janë në gjendje shoku, lodhje dhe urie e pagjumësie. Nga Laçi bëj thirrje për përfshirjen e Kurbinit në gjendjen e fatkeqësisë natyrore, ndihma të menjëhershme, të mjaftueshme dhe pa dallim për të gjithë familjet në nevojë, vlerësim të rrezikut për banesat e goditura dhe evakuim në mjedise të sigurta dhe të përshtatshme të të dëmtuarve. Nuk duhet humbur kohë, as pritur më e keqja, para se të veprohet. Kurbini është në emergjencë!”, deklaroi Basha.
Ndërkohë, Qeveria ka bërë edhe një bilanc paraprak sa u takon dëmeve materiale. Sipas këtij bilanci, në Durrës janë 70 banesa të dëmtuara, 12 të shkatërruara totalisht, 176 pallate të dëmtuara rëndë. Në Tiranë, janë 15 të banesa shkatërruara plotësisht, 239 të dëmtuara, 8 pallate jashtë funksionit dhe 61 pallate të dëmtuar rëndë.
Rama njoftoi ngritjen e një komiteti kombëtar për ndërtimin, ndërsa propozoi që familjet e mbetura të pastreha nga shembja e pallateve në Thumanë t’u ndërtohen banesat në Tiranë. Mes masave të tjera të ndërmarra nga Qeveria është edhe shërbimi mjekësor dhe ilaçet e nevojshme falas për të gjithë të prekurit nga tërmeti, si dhe pagesa e karburantit për mësuesit që do të zhvillojnë mësim për fëmijët e familjeve të strehuara nëpër hotele.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
