Gazeta Si – Ashtu si Shqipëria disa ditë më parë, edhe Kosova ka zgjedhur më të mirët e vitit 2023 në një mbrëmje gala të organizuar nga federata. Ballkani, ekipi kampion, ka dominuar çmimet individuale, por edhe formacionin më të mirë të vitit.
Ilir Daja është vlerësuar me çmimin e ‘Trajnerit të vitit’. Trajneri nga Tirana jo vetëm e ka shpallur kampion Ballkanin, por dy herë radhazi e ka çuar atë në fazën e grupeve të Ligës së Konferencës, ndaj dhe e ka merituar plotësisht çmimin.
“Dua ta ndaj këtë çmim me lojtarët, sepse ata janë aktorët kryesorë, me presidentin Kabashi dhe me të gjithë trajnerët e Kosovës, sepse unë jam njëri midis tyre dhe të gjithë kontribuojmë për zhvillimin e futbollit të Kosovës”, – tha Daja në momentin e marrjes së çmimit.
‘Lojtari më i mirë i vitit’ është shpallur Lumbardh Dellova, po i Ballkanit. Pjesë e formacionit më të mirë janë përzgjedhur edhe tre emra të njohur në Shqipëri, si portieri Enea Koliçi, mbrojtësi i majtë Lorenc Trashi dhe sulmuesi Nazmi Gripshi. Që të tre janë pjesë e Ballkanit, që kryeson kampionatin në Kosovë.
Gjatë mbrëmjes u dhanë edhe çmime të tjera. Amir Rrahmani ka marrë çmimin ‘Fadil Vokrri’, Samir Ujkani ka fituar çmimin e karrierës, kurse Albion Rrahmani atë të golashënuesit më të mirë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
