Ish ministri i Jashtëm i Kosovës, Enver Hoxhaj thotë se e ka parë draftin e kryeministrit Edi Rama për Asociacionin e komunave me shumicë serbe në veri.
Për gazetarët, Hoxhaj, i cili aktualisht është deputet i PDK-së, njëherësh edhe nënkryetar i Kuvendit të Kosovës, u shpreh se ky draft i propozuar nga kreu i qeverisë shqiptare është i rëndësishëm për zhvillimin e diskutimeve të mëtejshme.
Ai ka refuzuar që të japë komente në lidhje me këtë draft. Mbështetjen për draftin, Hoxhaj e konfirmoi më pas edhe me një status në rrjetet sociale.
“Unë mbështes qëndrimin e kryeministrit Edi Rama për krizën në veri të Kosovës. Është thelbësore që Kosova të punojë së bashku me aleatët tanë strategjikë në mënyrë që të adresojmë me përgjegjësi dialogun Kosovë-Serbi dhe qasja më e qëndrueshme është përmes një marrëveshjeje të plotë të njohjes reciproke”, shkroi ai në Twitter.
I support the stance of 🇦🇱PM @ediramaal on the crisis in the north of #Kosovo. It’s essential for 🇽🇰 to work together with our strategic allies in order to responsibly address the Kosovo-Serbia dialogue & the most viable approach is through a full mutual recognition agreement. pic.twitter.com/k0tqL2QUgL
— Enver Hoxhaj (@Enver_Hoxhaj) June 8, 2023
Kryeministri Edi Rama deklaroi këtë të enjte se i ka dorëzuar një draft propozim, presidentit francez, Emannuel Macron dhe kancelarit gjerman, Olaf Scholz në lidhje me Asociacionin e komunave me shumicë serbe në veri të Kosovës.
Rama theksoi se draftin nuk e ka konsultuar me kryeministrin e Kosovës, Albin Kurti dhe i bëri thirrje këtij të fundit që të tërheqë policinë nga ndërtesat komunale në veri e të dëgjojë partnerët ndërkombëtarë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
