.png)
Gazeta Si - Edhe pse i mohuan akuzat, Gjykata e Elbasanit, vendosi "arrest me burg" pa afat për Arben Spahiun, ndërsa për Arsen Preçin u vendos "arrest me burg" për 60 ditë.
Spahiu dhe Preçi u arresuan disa ditë më parë në lagjen “Emin Matraxhiu” pas gjetjes së një automjeti BMW X6 në brendësi të cilit ishin 3 automatikë dhe dy shishe me benzinë.
Seanca u zhvillua nën masa të rrepta sigurie, pa prezencën e mediave. Megjithatë edhe në sallë të gjyqit, dy të arrestuarit raportohet se i kanë mohuar akuzat.
Spahiu dhe Preçi u vunë në pranga nga policia të hënën, pasi dyshohet se kishin organizuar kryerjen e një atentati ndaj një personazhi të njohur të botës së krimit në Elbasan.
Dyshja rezultojnë me lidhje familjare dhe shoqërore me Erjon Alibejn, i cili ndodhet në burg si porositës i dy vrasjeve.
Arben Spahiu, 53 vjeç, banues në Elbasan, akuzohet për veprat penale “Mbajtja pa leje dhe prodhimi i armëve, armëve shpërthyese dhe municionit”, “Falsifikimi i dokumenteve” dhe “Sigurimi i kushteve dhe mjeteve materiale për të kryer vrasje”.
Ndërsa Arsen Preçi 44 vjeç, banues në Elbasan, akuzohet për veprën penale “Mbajtja dhe prodhimi i armëve, armëve shpërthyese dhe municionit”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
