.png)
Nga Xhuliana Toci– Dy avionë me qytetarë nga Shqipëria raportohet se kanë mbërritur në Beograd për t’u vaksinuar kundër Covid-19 me dozat e Astrazeneca, pasi Serbia njoftoi këtë javë se kishte hapur vaksnimin për qytetarët e huaj.
Gazetar Idro Seferi raporton nga Beogradi se rreth 10 mijë qytetarë nga i gjithë rajoni po presin në radhë për t’u vaksinuar në qëndrën e panairit të Boegradi. “Kanë ardhur dy avionë nga Shqiperia, ka edhe nga Kosova dhe Maqedonia e Veriut, madje njëri mbante maskën me yje të flamurit maqedonas. Nuk ka një, dy ose tre por mbi 10000 qytetarë”, shkruan gazetari shqiptar nga Beogradi në faqen e tij në facebook.
Edhe pse nuk është ende e qartë se çfarë fshihet prapa kësaj strategjie të shtetit serb, pas lajmit të së mërkurës se Serbia kishte hapur vaksinimin për qytetarët e huaj, dhjetëra maqedonas, bosnjakë, malazezë, si edhe shqiptarë duket se jane duke përfituar nga shpejtësia dhe lehtësia e vaksinimit në Beograd. Ata nuk kanë nevojë për asgjë tjetër përveç një pasaportë.
Po ashtu, dhoma e Tregtisë dhe Industrisë së Serbisë, në bashkëpunim me Qeverinë e Republikës së Serbisë, ka organizuar imunizimin e mijëra biznesmenëve të rajonit. Ky institucion i ka bërë thirrje të gjithë biznesmenëve dhe punonjësve të tyre të cilët vijnë nga vendet e rajonit të Ballkanit, si Bosnje e Hercegovina, Maqedonia e Veriut, Mali i Zi, Shqipëria e Kosova, që nëse janë të interesuar të vijnë të vaksinohen në Beograd.
Në Beograd po ashtu kanë mbërritur edhe shtetas të Shqipërisë. Ata janë përfaqësues të Dhomës së Tregtisë. Dhoma e Tregtisë në Shqipëri nuk ka dhënë detaje se sa përfaqësues të saj do të vaksinohen në Serbi, por drejtuesi i Dhomës së Tregtisë në Beograd tha se ka 100 mijë vaksina për të gjithë kolegët nga vendet e Ballkanit.
Agroni, një punëtor i Aeroportit të Tiranës, pas vaksinimit në Beograd, tha për Radion Evropa e Lirë se kjo ishte një mundësi e mirë që ai të imunizohej kundër sëmundjes COVID-19.
“Mendoj që organizimi ishte i mirë, çdo gjë ishte në rregull”, tha ai.
Disa kanë rezervuar më parë vaksinimin në internet me Institutin Kombëtar të Shëndetit Serb, ndërsa të tjerët jo.
“Sapo u paraqita në Panairin e Beogradit, ku po bëhet vaksinimi. Unë qëndrova në radhë dhe u vaksinova gjysmë ore më vonë” thotë Dragan Simic, një shofer 30-vjeçar nga Mali i Zi.
Driton Salihu, Drejtori i Shtëpisësë Shëndetit në Luginën e Preshevës tregoi për Gazetasi.al më së shumti kanë aplikuar për t’u vaksinuar ata që janë shtetas të huaj që nuk kanë dokumente të Serbisë po kanë vendqëndrim apo leje qëndrimi.
“Tani, të gjithë aplikuesit i kanë ftuar në Beograd të marrin vaksinën e AstraZeneca në fundjavë. Ata janë njoftuar nëpërmjet emailit dhe telefonit. Ata që kanë kërkuar takimin online po vaksinohen falas nga shteti serb”, thotë Salihu.
Sanja, një parukere 40-vjeçare nga qyteti boshnjak i Banja Luka, aplikoi për vaksinim në Serbi një muaj më parë duke përdorur aplikacionin në internet.
Të mërkurën, ajo mori një mesazh ku thuhej se data e vaksinimit të saj ishte të shtunën, 28 Mars, në Sallën 11 të Panairit të Beogradit dhe ajo do të merrte vaksinën AstraZeneca.
Sanja tha se kur ajo aplikoi, duhet të zgjidhte edhe mes kategorisë së aplikantëve: shtetas të Serbisë, të huaj me të drejtë qëndrimi në Serbi dhe të huaj pa vendbanim në Serbi.
“Unë zgjodha kategorinë e tretë dhe më duhej vetëm një numër telefoni serb në mënyrë që ata të mund të më dërgonin një SMS me një njoftim,” tha Sanja.
Shoqes së saj Svjetlana iu dha e njëjta datë vaksinimi, edhe pse ajo aplikoi për t’u vaksinuar të martën.
Sidoqoftë, ajo kërkoi të vaksinohej në qytetin e Mali Zvornik, afër kufirit me Bosnjën, ose me një vaksinë kineze ose ruse. “Ata thanë se do të bëjë AstraZeneca. Nuk jam i sigurt a do të shkoj. Unë jam pak e frikësuar nga kjo vaksinë” tha Svjetlana.
Qytetarët e Malit të Zi fqinj dhe Maqedonisë së Veriut po shkojnë po ashtu drejt Serbisë për vaksinat që nuk mund t’i marrin në shtëpi. Bosnja, Mali i Zi dhe Maqedonia e Veriut po përpiqen të sigurojnë çdo vaksinë që munden kundër COVID-19. Numri i përgjithshëm i vaksinave që kanë arritur në Bosnjë dhe Mal të Zi deri më tani mezi janë të mjaftueshme për të vaksinuar 2 deri në 3 përqind të popullsisë.
Në Maqedoninë e Veriut, vetëm disa punonjës mjekësorë janë vaksinuar falë dhurimit të rreht 8 mijë vakinave nga Serbia.
“Partneri im dhe unë vendosëm që nuk mund të presim më për vaksinimin masiv në Maqedoninë e Veriut dhe se duhet të bëjmë diçka… Unë njoh disa njerëz që kanë bërë të njëjtën gjë,” tha Lidija, nga Shkupi, e cila po udhëton këtë fundjavë për në Beograd “për një fundjavë me diell, një kafe dhe sigurisht për t’u vaksinuar”.
Në fillim të kësaj jave, rreth 100 gazetarë dhe punonjës të mediave të Maqedonisë së Veriut morën vaksinën edhe në Serbi, falë bashkëpunimit midis Shoqatës Maqedonase të Gazetarëve dhe Shoqatës së Gazetarëve të Serbisë.
Jovana, 35 vjeç, nga Podgorica në Mal të Zi tha se do të shkojë po ashtu për vaksinim në Beograd.
“Nëse vaksinimi në Mal të Zi vazhdon me këtë ritëm, unë do ta bëj në Serbi sepse procesi i vaksinimit të tyre është më i shpejtë dhe unë gjithashtu mund të marr vaksinën Pfizer,” tha Jovana për BIRN.
Dragan shpjegoi se ndërsa ai po priste në radhë për vaksinimin, ai pa shumë të huaj gjithashtu që prisnin për vaksinim.
“Anglishtja mund të dëgjohej nga të gjitha drejtimet. Një djalë gjerman më tha se po vizitonte një mik në Beograd dhe dëgjoi se mund të vaksinohej, kështu që ai erdhi në Panairin e Beogradit” tha Dragan.
Ai kishte menduar se qytetari gjerman nuk do të mund të mund të vaksinohej. “Por unë e takova në dalje dhe ai më tha se ishte vaksinuar,” tha ai.
Raportet e mediave boshnjake kanë thënë një arsye pse Serbia po lejon qytetarë nga i gjithë rajoni të vaksinohen në Beograd është se Serbia ka sasi të mëdha të AstraZeneca që skadojnë së shpejti, por ky informacion nuk është konfirmuar.
Burimet: “Euractiv”, “Balkan Insight”
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
