.png)
Nga Gazeta Si – Fondi i vyer i veprimtarisë letrare të shkrimtarit të madh Ismail Kadare do të ruhet në një pavion të veçantë të Drejtorisë së Përgjithshme të Arkivave.
Familjarët e shkrimtarit të madh, me nismëtare vajzën Gresa Kadare kanë dorëzuar për ruajtje, administrim, restaurim dhe digjitalizim të gjithë koleksionin e tij letrar përfshirë dorëshkrime, skicë idesh, dorëshkrime të veprave të pabotuara si dhe drafte fillestare të punimeve të tij.
“Në Paris i janë ofruar shumë institucione të huaja, si universitete dhe akademia e Francës, biblioteka që të merrnin plotësisht apo dhe pjesërisht një pjesë të arkivave. Ka pasur propozim dhe nga Universiteti Princeton por e shikoja që Ismaili hezitonte dhe ishte në mëdyshje, diçka e pengonte dhe kurrë nuk dha përgjigje të saktë. E pyeta se çfarë mendonte të bënte dhe më tha që dëshira e tij ishte që arkivi të kthehet në Shqipëri kështu që ne po plotësojmë dëshirën e tij”, tha Gresa Kadare, e bija e shkrimtarit.
Më 1 korrik të këtij viti, Kadare ndërroi jetë në moshën 88-vjeçare. Ai lindi në Gjirokastër, më 28 janar të vitit 1936.
I pyetur nga mediat, botuesi Bujar Hudhri tha se Kadare kishte lënë diçka të papërfunduar por ishte shumë diskret në atë që shkruante.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
