Gazeta Si – Derbi i dytë i sezonit mes Tiranës dhe Partizanit nuk nxorri fitues, por u mbyll në barazim pa gola, ashtu siç ndodhi edhe në ndeshjen e parë.
Portieri Pano Qirko ishte heroi i Partizanit, pasi priti një penallti në minutën e 98-të, pas gjuajtjes së Prengajt, duke shmangur humbjen e të kuqve.
Ishte një përballje me shumë raste për shënim, në të dyja portat, por asnjëra nga skuadrat nuk ia doli të shënojë dot.
Në fakt Tirana e gjeti golin në minutën e 29-të, por u anulua për pozicion jashtë loje. Në krahun tjetër, Partizani ishte pa fat në fillim të pjesës së dytë, kur gjuajtja e Bintsouka u ndal nga shtylla.
Fundi i sfidës ishte dramatik, aty ku pas një aksioni për Tiranën nga e majta e sulmit, krosimi u ndal në dorën e Bytyçit brenda zonës. Kryesori Florjan Lata vijoi lojën, ndërsa te Tirana pati protesta dhe kartona për këtë fakt.
Pas disa minutave konsultave me VAR, arbitri e pa vetë rastin dhe akordoi penallti. Nga 11 metra distancë sulmuesi Prengaj gaboi te Tirana dhe Pano Qirko bëri heroin nga ana tjetër duke pritur penalltinë në minutën 90+7.
Në fund 0-0 dhe skuadrat ndajnë nga një pikë. Partizani vijon të jetë në krye të renditjes me 28 pikë, ndërsa Tirana me 16 pikë pozicionohet e shtata.
Për Tiranën plot dy vite pa fitore në derbi, me Partizanin që për ndeshjen e nëntë radhazi nuk humbet kundër bardhebluve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
