.png)
Bandat shqiptare po përdorin TikTok, Facebook dhe Instagram për të shitur cigare me çmime të ulëta për ‘dërgim ekspres’ në shtëpitë britanike, sipas një investigimi të Daily Mail.
Daily Mail shkruan se duhani i falsifikuar dhe i kontrabanduar është një nga produktet më fitimprurëse të tregut të zi, duke i kushtuar Thesarit britanik më shumë se 3 miliardë paund në vit në të ardhura të humbura nga taksat.
Policia thotë se tregtia dominohet nga grupet ndërkombëtare të krimit të organizuar, me fitimet që shkojnë në lloje të tjera të kriminalitetit, duke përfshirë trafikimin e drogës, trafikimin e armëve dhe kontrabandën e njerëzve.
“Me grupet shqiptare që tashmë kontrollojnë pjesën më të madhe të tregut të kokainës në Mbretërinë e Bashkuar, ato duket se po kalojnë edhe në tregun e zi të duhanit”, shkruan Daily Mail.
Një hetim i Daily Mail zbuloi shumë faqe në gjuhën shqipe në TikTok dhe Facebook që ofronin cigare nga marka të mëdha si Marlboro për klientët në Britani.
Cigaret përshkruhen si të ardhura nga Shqipëria ose Greqia dhe shiten për 6 deri në 7 paund kutia, krahasuar me mesataren e Britanisë prej 16 paund- duke sugjeruar se ato janë kontrabanduar për të shmangur taksën e duhanit dhe gjithashtu mund të jenë të falsifikuara.
Një llogari në TikTok dhe Facebook ka vepruar nën një emër që përkthehet përafërsisht si ‘paketa cigaresh shqiptare’ dhe ofron cigare nga Greqia dhe Shqipëria për dërgesa në shtëpi.
Një gazetar i fshehtë që punonte për Mail kontaktoi llogarinë dhe iu ofruan dhjetë pako cigare secila përmbante 20 cigare- për 65 paund. Kjo arriti në 6.50 paund për pako, krahasuar me 17.75 paund në supermarketet britanike.
Një faqe e dytë në TikTok, e quajtur ‘Cigare Shqiptare’, i ofroi gjithashtu gazetarit pako cigaresh për 6.50 paund- duke shpjeguar se shoferi i tyre i shpërndarjes kishte udhëtuar ‘në veri’ për të lënë porositë, por do të ishte në gjendje të arrinte në shtëpitë në pjesën tjetër të vendit javën tjetër.
Pasi u kontaktua nga Mail, TikTok i mbylli të dyja faqet për shkelje të rregullave të saj kundër shitjes së mallrave të rregulluara.
Përveç TikTok dhe Facebook, faqe të ngjashme në gjuhën shqipe që shesin cigare mund të gjenden edhe në Instagram, shkruan media britanike.
Shqipëria njihet si një qendër prodhimi për cigare të falsifikuara, me hetuesit që kohët e fundit bastisën një fabrikë në qytetin e Librazhdit, në lindje të vendit.
Zyrtarët thonë se fabrika vepronte pa ndërprerje duke prodhuar miliona cigare që zyrtarisht ishin të destinuara për Qipron, por në të vërtetë kontrabandoheshin në vende të tjera europiane, përfshirë Britaninë.
“Cigaret e prodhuara ngarkohen në kamionë transporti dhe transportohen me rrugë tokësore dhe detare nëpërmjet Greqisë, Italisë, Francës dhe Zvicrës me destinacione përfundimtare në vendet e Bashkimit Europian dhe Britani”, thuhet në një deklaratë.
Burimi: Daily Mail. Përshtati: Gazeta Si.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje